Daily news
Богојески: Расте притисокот и заканите врз поддржувачите на реформите во ВМРО-ДПМНЕ
ПР стратегијата на сегашното раководство на ВМРО-ДПМНЕ е да не се говори за реформите туку да се оцрнат реформаторите, беше оценето на денешната трибина на „реформаторите“ на ВМРО-ДПМНЕ насловена како „Без табу теми“, која се одржа во Клубот на новинари во Скопје, во организација на ЦИВИЛ-Центар за слобода.
„Се пласираат тези во изминатиов период. Единствен начин е да лепат етикети и да нè дескридитираат, но ние нема да ја дефокусираме дискусијата. Дали членовите треба сами да ги избираат своите тела, тоа е прашањето на кое ќе инстираме. Дали ВМРО-ДПМНЕ треба да биде пријател или непријател со светските сили, со оглед дека нè обвинуваат дека сме се среќавале со претставници на меѓународната заедница“, посочи Александар Михајлоски.
Според Илија Илијоски, иницијативата е за системска реформа во партијата, а не за персонално распоредување. „ПР стратегиите ќе им паднат. Очигледно во добар дел на партијата тоа не е сфатено, но за кратко тоа ќе се смени“, рече тој.
Петар Богојески вели дека првиот ударен бран на закани бил прежесток и иако тоа се коси со сите стандарди во една демократска земја, во македонскиот случај дава резулатити.
„Но, не е толку страшна заканата кон нас лично, не се плашиме и ќе издржиме. Проблемот е кон обични граѓани кои не сакаат да бидат политичари туку едноставни членови на ВМРП-ДПМНЕ. Тие се во пожесток притисок од нас. Тоа е многу сериозен пристап, станува збор за притисок со јавување и испраќање лични пораки, до посети во нивните домови при што ги заплашуваат да не се осмелат во иднина да дадат поддршка. Ние сме вчудовидени зошто раководството на партијата не води сметка дека ризикуваат да направат поделби во партијата“, рече Богојески.
Александар Михајлоски на нападите дека сака да ја реформира ВМРО-ДПМНЕ откако не заработува како партиски адвокат, посочи дека се работи за манипулации со цел негова лична дискредитација. „Во мојата канцеларија поминале над 100 адвокати, мојот личен успех како адвокат не ми дава право да барам реформи во ВМРО-ДПМНЕ? Моите клиенти 90 % се странски компании, тие ми ги доведоа од раководството на партијата? Таа теза дека партијата ми дала работа не е вистина, тоа е со намера да се подметне лага со цел да се фрли црно светло на реформите. Ние тој тип дискусија нема да го прифатиме“, рече Михајлоски.
Реформаторите откриваат дека сè уште не е отворена дебата во ВМРО-ДПМНЕ и дека не знаат дали е разгледувано ова прашање. Според реформаторите, случувањата со Пржинскиот договор потврдија дека сме млада демократија, дека институциите не можат самостојно да ги решаваат проблемите во државата и политичките партии да бидат чинители за стабилизација.
„Го поздравуваме ангажаманот на меѓународната заедница која придонесе за стабилизација на политичкиот договор. Нашата забелешка по однос на Пржинскиот договор и на Пржино е што ниту еднаш овие точки во партијата не беа ставени на дневен ред пред Пржинскиот договор, или да се прифати СЈО во таква форма како што беше договорена“, рече Петар Богојески на прашањето дали се согласуваат со СЈО и Пржинскиот договор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.