Daily news
(ВИДЕО) За Груевски, одењето еднаш неделно во суд е политичка деградација
За поранешниот премиер и актуелен претседателот на ВМРО-ДПМНЕ, Никола Груевски, јавувањето еднаш неделно на суд е политичка деградација.
Денеска, во Апелацискиот суд се разгледува жалбата на Груевски на решението на првостепениот суд за одземање на неговиот пасош и за обврската еднаш неделно да се јавува во суд. Исто така, се разгледува и жалбата на Специјалното јавно обвинителство на решението на Кривичниот суд да не му одреди притвор на Груевски, кој е обвинет во предметот „Титаник“.
Според адвокатите на Груевски, јавувањето во судот е политичка деградација.
Обвинителот Гаврил Бубевски, пак, рече дека Груевски во текот на целата предистражна и истражна постапка бил недостапен за СЈО.
„На обвинетиот не можеше да му се достави ниту една покана. Примил само една покана на 6.4.2017. Не успеавме да најдеме доставувач кој ќе му врачи покана. Ни пошта ни ДХЛ. Сите други покани ги добило неговото обезбедување“, рече Бубевски.
Тој повторно побара притвор за поранешниот премиер.
„Бараме притвор за Груевски, само така ќе се обезбеди неговото присуство“, рече обвинителот.
„Освен во Израел, каде што премиерот кој не одговарал на поканите и за тоа е осуден за попречување на правдата, никаде во светот нема друг таков пример“, рече Бубевски.
Тој исто така рече дека СЈО му испратило 10 покани на Груевски. Истакна и дека одбраната на Груевски барала увид во доказите.
Груевски се товари за три сериозни кривични дела, меѓу кои и создавач на група за злосторничко здружување.
Бубевски рече дека има опасност Груевски да влијае врз сведоци и врз другите обвинети и затоа се бара притвор за него. Обвинителот рече дека преку партијата членството на ВМРО-ДПМНЕ било агитирано да излегува на протестите во Охрид кога СЈО испитуваше сведоци.
Адвокатот Боро Тасевски бара контрадикторност на постапката, што значи и Груевски и одбраната да се произнесат за предметот. Според него, одлуките на првостепениот суд за Груевски ќе завршат во историските архиви.
Тасевски рече дека судот при одлучување треба да цени и тоа дека Груевски е лидер на најголемата политичка партија и поранешен премиер.
Адвокатката Сања Алексиќ рече дека има 26 илјади страници доказен материјал кои Груевски немал време да ги проучи и затоа не се јавувал во СЈО.
„Груевски, без разлика дали бил поканет во обвинителството, за секое излегување од државата СЈО било известувано дека нема да биде во Скопје“, рече Алексиќ.
Адвокатот Димитар Дангов, пак, пред Судот рече дека Груевски е должен само еднаш да се јави во СЈО. Според него, обвинителниот акт за „Титаник“ е поднесен до Кривичниот суд по истекување на законскиот рок во кој СЈО можеше да поднесува обвиненија.
Дангов читаше пресуди на Европскиот суд за човекови права за да му укаже на Судот дека имало слични судски постапки и одлуки во корист на обвинетите.
За случајот „Титаник“ на Груевски му се заканува казна затвор од најмалку 5 години. Тој денеска се појави половина час порано во судница.
В. Маглешов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.