ВМРО-ДПМНЕ: Граѓаните на Велес синоќа се соочија со еколошка бомба

ВМРО-ДПМНЕ: Граѓаните на Велес синоќа се соочија со еколошка бомба

Граѓаните на Велес синоќа се соочија со еколошка бомба. Мерните станици во градот покажаа опасно висока загаденост на воздухот со ПМ10 честички. Слична беше ситуацијата и во други делови од државата, реагира опозицијата.

„Последиците од загадениот воздух секој ден сè повеќе ги чувствуваме. Секој ден болниците во Република Македонија се полнат со пациенти кои имаат респираторни заболувања. Граѓаните се оставени сами на себе и единствениот спас да се заштитат од загадениот воздух е да се затворат во своите домови“, велат од ВМРО-ДПМНЕ.

Обвинуваат дека новата Влада не преземала чекори кон подобрување на квалитетот на воздухот туку напротив ги укинува и корисните мерки кои ги воведе претходната влада, а биле во насока на подобрување на животната средина и квалитетот на воздухот.

„СДС се осмели да го укине и ‘Ден на дрвото’. Преку оваа акција досега се засадија над 36 милиони садници, со над 50 отсто успешност, што е висок процент за ваков тип садници. Наместо градоначалниците да ги спроведат мерките со кои се фалеа за време на локалните избори, тие тргнаа со контрамерки. Градоначалниците Шилегов и Богоев ги стартуваа мандатите со сечење дрва низ градот намалувајќи ја зелената површина“, стои во соопштението што утрово го испрати ВМРО-ДПМНЕ.

Опозицијата бара од Владата и градоначалниците да сносат одговорност поради непреземање мерки околу намалување на екстремната загаденост на воздухот.