Daily news
Историја на Каталонија: Кои се Каталонците и зошто бараат независност?
Каталонците се народ со посебен јазик, култура и историја. Живеат во каталонските земји, во чиј состав влегуваат Валенсија, Балеарските Острови, делови од шпанскиот регион Арагон, Русилон во јужниот дел на Франција и самата Каталонија. Каталонија е област во североисточна Шпанија каде што живеат 7,5 милиони луѓе. Оваа област учествува со 15 проценти од шпанската популација и 20 проценти од нејзината економија. Меѓу најпознатите Каталонци се сликарот Салвадор Дали, архитектот Антони Гауди, Џоан Миро, Феран Адрија и фудбалерот Пеп Гвардиола.
Каталонската автономија е тема што често се повторува во историјата на земјата.
Дефинираниот регион на Каталонија првпат бил споменат во 12 век, стотици години пред обединувањето на Шпанија. По декретот на Нуева Планта од 1716 година, бил ставен под директно владеење на Мадрид. Во 1931 година, кога Шпанија станува република, Каталонија добила поголема политичка автономија во државни рамки. Но, по Граѓанската војна во Шпанија, воената влада на Фрациско Франко ја укинала автономијата на регионот. Во текот на владеењето на Франко, од 1939 до 1975 година, каталонската култура била строго потисната. Симболите на каталонскиот идентитет, како castellas или кули од луѓе, биле забранети, а Каталонците, според некои информации, биле принудени да им даваат шпански имиња на своите деца. Во јавноста било забрането да зборуваат на мајчин јазик.
По падот на Франко желбата за автономија на Каталонија повторно еволуирала. Во 1979 година бил објавен нов Статут за Каталонија, подоцна обновен од каталонскиот парламент. Изборите за телото од 135 члена беа одржани во март следната година. Регионот, кој го сочинува една од 17-те шпански автономни заедници, има своја сопствена полиција и овластување за прашања како што се образованието, здравството и социјалната заштита. Исто така, постојат одредби за заштита на каталонскиот идентитет вклучувајќи статус на заеднички јазик за каталонски и кастилски, а со законот, наставници, лекари и вработени во јавниот сектор може да го користат каталонскиот јазик на работното место.
Напорите за целосна независност од Шпанија добиваат интензитет последниве години, особено по економската криза во Шпанија во 2008 година. Поддржувачите на независноста тврдат дека Каталонија е еден од најбогатите шпански региони и дека дава повеќе финансиска поддршка за Шпанија, повеќе од централната влада во Мадрид. Многумина сметаат дека силната економија на регионот покажува дека ќе биде одржлива како суверена држава. Во Барселона, главниот град на Каталонија и една од поголемите туристички дестинации, живеат околу 1,6 милион луѓе.
Референдумот за независност што се одржа вчера е втор во последните три години. На 9 ноември 2014 Каталонците спроведоа т.н. симболичен референдум бидејќи по барање на централната влада во Мадрид, Уставниот суд на Шпанија во два наврата го прогласи незаконско организирањето референдум за независнот на Каталонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.