Daily news
Кој ќе ги брани осомничените и обвинетите од СЈО, договорот на адвокатскиот тим на Додовски истекува на 30 јуни?
Договорот на тројцата адвокати што му помагаат на адвокатот Никола Додовски во сите предмети поврзани со Специјалното јавно обвинителство истекува на 30 овој месец, денот кога завршува рокот од 18 месеци во кој СЈО може да поднесе обвиненија. Тие не знаат дали ќе биде продолжен и ќе работат како тим или, пак, некој од нивните клиенти ќе ги ангажира посебно. Ова за Макфакс го изјави скопскиот адвокат Боро Тасевски и поранешен претседател на Кривичниот суд, кој е дел од тимот, заедно со колегите Сања Алексиќ и Петар Василев, кој му помага на Додовски во неколку случаи.
По повлекувањето на Никола Додовски од одбраната на повеќе функционери на ВМРО-ДПМНЕ во предметите кои ги води СЈО, нов адвокат на Сашо Мијалков, екс-директорот на УБК, ќе биде адвокатот Љупчо Шврговски, кој на јавноста ѝ е познат како поранешен јавен обвинител.
Шврговски, како што изјави за медиумите, во конкретните предмети влегува на местото на Додевски, но нема информација дали неговиот колега нема да ги брани и другите функционери на ВМРО-ДПМНЕ. Првиот човек на Адвокатската комора во Македонија и еден од најангажираните и најплатени адвокати во земјава, е повикан како сведок во случајот „Талир“ за незаконското финансирање на ВМРО-ДПМНЕ.
Адвокатот Никола Додовски денеска не беше достапен за коментар.Наместо одговор, добивме автоматска порака дека „не може да одговори бидејќи е зафатен“.
Тасевски, пак, со одговор: „Немаме информации што ќе се случува понатаму. Нас како соработници во тимот ни е битно да го испочитуваме договорот со Додовски до крај. Но, дали ќе продолжиме соработката и натаму или, пак, ќе нè ангажира некој друг посебно, ќе видиме натаму“.
Тасевски и неговите двајца колеги беа дел од петчлената екипа што му помагаше на Додовски во случаите поврзани со СЈО. Но, во меѓувреме двајца адвокати,од кои едниот од Охрид, се повлекоа од тимот. Во отсуство на Додовски-Тасевски, Алексиќ и Василев беа бранители на првообвинетиот во случајот „Тврдина1“, Горан Грујовски, кој неодамна почна со главна расправа во Кривичниот суд, а чие продолжение е закажано на 3 јули, во 11 часот.Адвокатската тројка може да се види и кога високи функционери од ВМРО-ДПМНЕ се појавуваат на распит во СЈО, или да направат увид во доказниот материјал.
Г.Дувњак
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.