Daily news
Пожарот кај Моране се префрли накај Орешани
Пожарот кај селото Моране се префрлил во атарот на село Орешани , општина Зелениково. Пожарот зафатил нискостеблеста шума, но ако се прошири кон реката и над викенд населбата Орешани може да навлезе во високостеблеста борова шума. На терен се екипи на БППЗ на Град Скопје, а се очекува да се придружат и други, информира Центарот за управување со кризи (ЦУК).
На подрачјето во правец од село Бојане кон село Желино во моментов гори сува трева и нискостеблести растенија. Противпожарни екипи се на терен и во моментот нема потреба од воздушна интервенција, но доколку пожарот се прошири до Желино тогаш возможно е да ги зафати и зимзелените и дабови растенија.
Пожарот кај браната Матка е изгаснат и на терен е оставена екипа да дежура. Зафатена била нискостеблеста шума во општина Сарај. Изгаснат е и пожарот кај село Барово, општина Сопиште со навремена интервенција на екипа од ЈП „Паркови и зеленило“. Во пожарот горела нискостеблеста шума.
Пожарот во атарот на село Требовље и село Растеш се уште е активен. Во гаснењето се ангажирани АРМ (за пожарот во село Требовље и дел од атарот на село Растеш), месно население од село Растеш, лице од село Заград и доброволци од Кичево, Прилеп и Скопје.
Како што соопшти Центарот за управување со кризи (ЦУК), вработените на Шумското стопанство „Сандански“ – Македонски Брод се ангажирани за дејствување на пожарот во село Растеш. Тие преземаат активности за локализирање на пожарот, за да не се приближи до куќите и шталите со стока кои се во подножјето на селото и спречување на пожарот во месноста викана Коритски Дол.
На пожарот во село Девич ангажирани се лица од Шумското стопанство „Сандански“ – Македонски Брод, кои го контролираат. Горните куќи од Девич не се загрозени. Пожарот е под контрола и со намален интензитет на месноста викана Попец.
Во моментов има нов пожар во атарот на село Могилец, каде дејствува Територијална противпожарна единица од Македонски Брод.
Пожарот во атар на селото Близанско, на месностите викани Брдо и Круша, повторно се активира и се движи кон месноста Фојник и постои опасност доколку не се стави под контрола да префрли на атарот на селото Брест. Пожарот од атарот на селото Растеш се проширил на атарот на село Волче и постои опасност од опожарување на селото.
ЦУК нагласува дека гасењето на пожарите го отежнуваат високите температури и присуството на ветар.
Пожарот во атарот на селата Дрен – Смолани, кој беше изгаснат вчера, денеска од 7 часот повторно е активен и веќе се проширува на горниот дел на планината. Екипата за гасење е се уште на местото на настанот. Зафатена е претежно нискостеблеста дабова шума, чалија, смрека и др. Се работи за непристапен терен.
Се уште активен е пожарот во атарот на селото Подвис, кој почна на 2 август. Гори нискостеблеста деградирана дабова шума, сува трева и стрништа. Поради високите температури, правецот на ветерот и непристапноста на теренот отежнато е гаснењето. Пожарот се шири од пределот по ридот кон селото Алданци. На терен во моментов се ангажирани екипи на Територијалната противпожаран единица Крушево и Шумското стопанство „Липа“ – Крушево.
Во реонот на Тетово активни се два пожари на отворен простор. Над село Копанце каде гори површина обрасната со сува трева по сртот на планината Жеден и не е зафатена шума. На местото е екипа од Шумското стопанство „Лешница“ – Тетово.
Во атарот на село Гургурница активен е пожарот што од страната на Македонски Брод се префрли на територијата на општина Брвеница. Гори сува трева и пасишта, но постои можност да се зафати и високата шума. Екипа од Шумското стопанство „Лешница“ – Тетово се наоѓа на местото.
Пожарот во атарот на село Корито е активен и интервенира месното население, екипи на Шумското стопанство „Шар“ и Територијална противпожарна единица од Гостивар. Екипа на ТППЕ Гостивар интервенира и на пожар кај месноста викана Тумчевишка Петла во Гостивар.
Од Повардарскиот плански регион, пожарот во атарот на село Дреново, во месноста Дреновска Корија е активен и со него зафатена е шума под даб, јасен и бука. На терен е екипа на Шумско стопанство „Бабуна“ – Велес, но пожарот е интензивен и се бара поддршка за гасење од воздух.
Активен е пожарот во атарот на селото Богомила во месноста Црвен Дол. Екипата на Шумско стопанство „Бабуна“ гаси од страна на село Мокрени и прави појас. Таму е и екипа на Дирекцијата за заштита и спасување од Велес. Поради можноста пожарот да оди кон село Богомила, испратени се авиони за гасење.
– Пожарот на падините на Горна Јакупица е активен, но теренот е исклучително непристапен за гасење, соопшти ЦУК.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.