Производството на електрична енергија во ЕЛЕМ во континурирано опаѓање

Производството на електрична енергија во ЕЛЕМ во континурирано опаѓање

Владата на Република Македонија на денешната седница ја разгледа информацијата за затекнатата состојба во АД „Електрани на Македонија“ во периодот од почетокот на оваа година до 1 август.

Во соопштението од владината прес-служба се наведува дека, според анализата, производството на електрична енергија во ЕЛЕМ е во континуирано опаѓање, а потрошувачката на јаглен и мазут, по произведен мегават електрична енергија, е во постојан пораст. Оваа, како што се наведува, нелогичност во работењето на ЕЛЕМ, според согледувањата во информацијата, се должи на несоодветната ревитализација на соодветните капацитети за електрична енергија, како и на недомаќинското работење со склучување скапи договори со надворешни компании од поранешното раководство.

Според анализата, карактеристика во затекнатото работење на АД ЕЛЕМ е прекумерната и непродуктивна превработеност, а за платите и хонорарите на над 5.489 вработени и ангажираните лица со авторски договори во 2016 година биле потрошени 56,8 милиони евра.

– Како исклучително високи трошоци за разни услуги највисоки се оние за услугите на адвокатски канцеларии во земјата и странство, кои за три години изнесуваат 2,5 милиона евра – стои во соопштението.

На денешната седница Владата на РМ му препорача на новото раковдство на АД „Електрани на Македонија“ да предложи излезни решенија за оваа ситуација во која се наоѓа компанијата, да ги стави во употреба сите капацитети за да го зголеми производството на електрична енергија за да се избегнат евентуални проблеми со недостигот на струја и за да се избегне фактот кој навестува најниско производство на електрична енергија во историјата на ЕЛЕМ.

На денешната седница Владата сугерира дека за оваа состојба, во која е доведено ова акционерско друштво на 1 август кога компанијата е преземена од новиот раководен тим, треба да биде подготвена сеопфатна информација за запознавање на јавноста.