Села: Нема да му бидам министер на Заев

Села: Нема да му бидам министер на Заев

Лидерот на „Алијансата за Албанците“, Зијадин Села, негира дека ќе го замени својот сопартиец Арбен Таравари на министерското столче во Министерството за здравство. По пишувањата во некои од медиумите дека ексградоначалникот на Струга е можен кандидат за прв човек во здравството, Села за „Макфакс“ вели дека нема намера да му биде министер на Заев.

– Јас министер на Заев!? Па, ве молам, се сметам за човек што има самопочит и интегритет – изјави Села за „Макфакс“, без да прецизира дали ова значи дека „Алијансата за Албанците“ ќе ја напушти владината коалиција.

Зијадин Села ја изгуби битката за градоначалник на Струга од кандидатот на ДУИ – Рамиз Мерко, кој досега ја извршуваше функцијата министер без ресор за привлекување странски инвестиции. Села изјави дека не ги признава изборните резултати бидејќи, според него, имало поткуп и уцени на гласачи вршени од партиски активисти заедно со полицијата. Тој го обвини Заев дека успеал да ја продлабочи поделбата меѓу етничките заедници, а Ахмети го повика да се пресметаат на парламентарни избори.

Министерот за здравство, Арбен Таравари, се очекува да ја преземе градоначалничката функција во Гостивар, а за негов наследник веќе се шпекулираат имињата на офталмологот Беким Татеши, кој моментно е директор на Универзитетската клиника за очни болести во Скопје и д-р Фатмир Џафери, кој исто така е специјалист за очни болести.

Дали Министерството за здравство ќе остане резервирано за „Алијансата за Албанците“ нема официјална потврда, иако Таравари кога ја најави својата кандидатура за градоначалник уверуваше дека неговата партија има доволно лекари што ќе може да го заменат во Министерството за здравство. Владата треба да најде и нов човек на местото заменик-министер за образование бидејќи Висар Ганиу поднесе оставка и беше избран за градоначалник на Чаир.

Г.Н.Р