Синдикатот на „Југохром“ бара нова средба со Заев

Синдикатот на „Југохром“ бара нова средба со Заев

Синдикатот на компанијата „Југохром“ бара нова средба со премиерот Зоран Заев бидејќи сè уште ништо не е реализирано од претходниот состанок меѓу нивните претставници и Владата, што се одржа на 18 јуни оваа година.

Во соопштението до медиумите синдикатот вели дека сакаат да бидат информирани од премиерот за моменталната состојба и за неговото видување на статусот на компанијата“, бидејќи, како што се додава во соопштението, синдикатот бил под притисок од вработените во „Југохром“, кои бараат организирање протести.

„На одржаната средба со Вас и со Кочо Анѓушев беше договорено дека ќе преземете активности за одржување средба со сопственикот на компанијата и со невладините организации, за повторно да се разгледаат и да се најдат начини за фабриката да почне со работа. Бидејќи помина подолго време, а сме под силен притисок од вработените во ‘Југохром’ за организирање протести, бараме да одржиме средба на која би нè информирале за моменталната состојба и за вашето мислење за статусот на компанијата. Ве молиме бараната средба да биде одржана во најкраток можен рок, односно уште во текот на оваа недела“, се вели во соопштението од „Југохром“.

Комбинатот престана со работа на 31 октомври минатата година откако Инспекторатот за животна средина донесе одлука да се запре производствениот процес на фабриката, поради непочитувањето на рокот за изградба на филтер-станицата.