Daily news
Алаѓозовски: Ќе го заштитиме и унапредиме статусот на Македонскиот јазик
На денот на сесловенските просветители, Св. Кирил и Методиј, кои ги поставија темелите на писменоста и јазикот како наш идентитетски белег, уште еднаш се обврзуваме дека ќе го заштитуваме Македонскиот јазик, ќе го афирмираме и ќе го унапредуваме неговиот статус.
Ова во среда го порача Роберт Алаѓозовски, претседател Комисијата за култура на СДСМ, кој додаде дека во Програмата на новата Влада, се предвидени низа мерки преку коишто Македонскиот јазик ќе го добие значењето што му припаѓа, како службен јазик во Република Македонија.
„Ќе се фокусираме на изработка на темелна стратегија за заштита, унапредување и афирмација на Македонскиот јазик, во којашто ќе бидат вклучени сите клучни институции и експертската јавност. Државните институции и установи ќе мора да го почитуваат и употребуваат Македонскиот јазик, наместо како досега да служи како средство за поттикнување етнички тензии за политички цели“, рече Алаѓозовски.
Тој најави зголемување на капацитетите на Институтот за Македонски јазик со научен кадар и поддршка на проекти и научни дела посветени на Македонскиот јазик од сите области.
„Ќе формираме постојан Одбор за стандардизација на Mакедонскиот јазик што ќе има задача да ги решава проблемите што се појавуваат во пракса, а за кои нема предвидени нормативни. Одборот ќе биде составен од експерти од Катедрата за македонски јазик, Институтот за Mакедонски јазик, МАНУ, како и истакнати писатели, културни работници од областа на јазикот и на литературата, педагошки работници. Одборот транспарентно ќе ги комуницира своите решенија со јавноста“, појасни Алаѓозовски.
Како еден од приоритетите ќе биде изработка на електронски корпус на Македонскиот јазик и дигитализација на целокупниот материјал од Речникот на Македонскиот јазик.
„Ќе ги доработиме електронските бази посветени на Македонскиот јазик: документи, книги, списи, научни податоци во врска со Македонскиот јазик на глобалната мрежа.
Меѓународниот семинар за Македонски јазик, литература и култура ќе прерасне во Македонистички центар, со повеќе едукативни функции, вклучувајќи и стипендирање на поголем број странци кои го изучуваат Македонскиот јазик, литература и култура.
Досегашната власт покажа тотална негрижа за Македонскиот јазик. Изостана поддршката за лекторатите по Македонски јазик на странските универзитети и на македонистите во странство. Со тоа се намали бројот на изучувачите на Македонскиот јазик во странство, се загрози промоцијата и меѓународната афирмација на македонскиот јазичен и културен идентитет. Новата Влада ќе посвети особено внимание на одржувањето на постојните лекторати и отворањето нови. Посебен приоритет ќе биде отворањето лекторати во земјите на ЕУ, САД и Австралија“, истакна Алаѓозовски.
Според него, ќе биде посветено големо внимание на значајните личности за македонскиот јазик и македонската култура.
„Ќе ги обновиме нивните родни куќи и ќе ги издигнеме на ниво на музеи, а поддршката ќе продолжи за постојните, како онаа на Блаже Конески во Небрегово. Ќе ја поддржиме и собирачката дејност: народни песни, приказни, дијалектолошки материјали, како и нивна дигитализација. Ќе го зголемиме интересот за Македонскиот јазик преку политики на привлечност односно атрактивност за учење на јазикот, а не преку рестриктивни мерки и глоби. Ќе се грижиме за Македонскиот јазик, но и за почитување на богатството различности на нашата држава, градејќи просперитетно општество за сите нејзини граѓани“, рече Алаѓозовски. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.