Daily news
Бакрачески: Со методата ротаблација пациентите ќе добијат лекување без класична хируршка интервенција
Денес во Заводот за кардиоваскуларни заболувања Охрид беше промовирана нова метода во рамките на одделот на Интервентна кардиохирургија.
Како што истакна градоначалникот Никола Бакрачески , во принцип оваа техника не е толку нова , но потребата се наметна по се почестата употреба особено кај пациенти кои имаат комплексни запушувања на срцевите крвни садови.
„Во такви случаи се користи оваа метода на ротаблација, каде со еден дијамантски сврдел се навлекува на една коронарна жица, се врши гребење на калциумските депозити, за да може во еден момент да се овозможи проаѓање на други жици и да се заврши со поставување на стент на срцевите артерии.
Се работи за процедура која што е резервирана за редок број на центри, бидејќи нејзината употреба меѓу пациентите , варира од центар до центар од прилика од 3-7%.
Нејзината примена се наложи со стареење на популацијата со усовршување на техниките и потрошниот материјал во интервентна кардиологија„, истакна Бакрачески, кој во суштина е лекар.
Ваквата метода се користи кај се поголем број постари пациенти кои што имаат комплексни запушувања. Во нашата држава оваа метода се употребува и во клиниката за кардиологија, а од денес официјално и во Заводот за кардиоваскуларни заболувања во Охрид.
Како што напомена градоначалникот Бакрачески, од пред 4 години во употреба е и интраваскуларниот звук со цел полесно поставување на срцеви стентови.
Градоначалникот Бакрачески се заблагодари посебно на “Boston Sientific ”, која што е производител на опремата и на потрошениот материјал за една ваква процедура.
Заводот за Кардиоваскуларни заболувања една деценија наназад бележи интензивен раст и развој на оваа институција, како и постојано иновирање на нови техники кои се неопходни за завршување на ретки, но комплексни процедури, кои може да се изведуваат само во мал број на центри.
Според податоците кои ги изнесе Доцент др.Владан Лукшевиќ, заменик директор на Клинички центар на Србија , станува збор за навистина напредна технологија со која нема потреба од класична хируршка срцева интервенција.
„Ако пресметате 2-3% од 1.600 процедури ќе дојдете до бројка дека некаде околу 40 пациенти годишно со стандардна процедура на вградување на стент не може да биде излечен , бидејќи не постои техничка можност за тоа. Оваа метода ќе овозможи овој процент на пациенти да добијат лекување без отворање на градниот кош и без класична хируршка интервенција„, истакна др. Лукшевиќ.
Докторот посебно се заблагодари до тимот кој асистираше во салата за време на интервенцијата, а изрази и голема пофалба за самиот уреден простор во Заводот за кардиоваскуларни заболувања во Охрид, како и условите кои се најпозитивни за работа.
„Македонската кардиологија е водечка во регионот ,во однос на интервенциите кои се работат. Ние ги праќаме нашите доктори кај вас на обука. Она на што посебно ви завидувам е многу добра и квалитетна мрежа за лекување на пациентите.
Македонија е прва земја од бившите југословенски држави која ја заокружила својата територија со доволен број на сали за интервенција , за сите пациенти„, додаде Др. Лукшевиќ…крај/мф/кс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.