Daily news
Благодарници за учесниците во гаснењето на пожарот кај Трескавец
Општина Прилеп и градоначалникот Марјан Ристески денеска им доделија благодарници на сите кои учествуваа во гаснењето на пожарот кој пред десетина денови беснееше околу манастирот Трескавец.
„Стануваше збор за една голема огнена стихија што ја зафати околината на манастирот Трескавец и која предизвика голема материјална штета. За среќа, во таа непогода немаше човечки жртви. На стихијата се спротивставија голем број наши сограѓани на кои во овој момент сакам да им се заблагодарам. Тие успеаја со натчовечки напори да го заштитат овој наш многу значаен манастирски комплекс. Голема благодарност пред сè до ТППЕ од Прилеп и Битола за нивната професионалност и посветеност во гаснењето на огнот. Исто така голема благодарност и до сите кои учествуваа со човечки ресурси и механизација како ЈКП ‘Комуналец’, ЈКП ’Водовод и канализација’, ‘Прилепска пиварница’, ‘Комфи Ангел’, ‘Мермерен комбинат’, ЈП ‘Паркинзи’, ЈП ‘Македонски шуми’, особена благодарност до населеното место Мажучиште, навивачката група ‘Мајмуни’, сите планинарски друштва од градов и уште голем број други доброволци кои активно учествуваа за да се спречи оваа стихија“, изјави Марјан Ристески, градоначалник на Прилеп.
Освен пожарот кај Трескавец, Општина Прилеп деновиве беше зафатена и од други пожари кои предизвикаа огромна материјална штета.
„Во изминативе 15-тина дена во Општина Прилеп имаше катастрофални пожари. Еден од нив беше и пожарот околу манастирот Трескавец каде што имавме неколкудневна борба со огнената стихија за спасување на манастирот. Во таа борба се вклучија и поголем дел на активисти, граѓани, јавни и приватни претпријатија и други. Јас би сакал да упатам апел, а тоа е да не се потценува ниту еден пожар. Овој пожар беше почетокот многу мал, но за краток временски период премина во катастрофален и уништи огромна површина на квалитетна борова шума, уништи голем дел од флората и фауната на овој простор. Но, не е само овој пожар, и другите пожари уништија големи шумски пространства во Дрен – Смолани, Никодим, Бонче, Крушевица и други места. Ќе бидат потребни децении за да се обноват сите овие шуми“, истакна Станко Колески, командир на ТППЕ – Прилеп.
Како помош на ТППЕ од Прилеп при гаснењето на пожарот кај Трескавец учествуваа и нивните колеги од Битола.
„ТППЕ од Битола веднаш одговори на повикот за гаснење на пожарот кај Трескавец. Се вклучивме со две возила и екипаж и учествувавме сè до локализирањето на огнот. Оваа соработка помеѓу Прилеп и Битола е вообичаена и секогаш си помагаме едни со други“, рече Костадин Попоски, командир на ТППЕ – Битола.
Доброволците кои денеска добија благодарници истакнаа дека и во иднина секогаш ќе бидат на располагање доколку се случи повторно некоја голема непогода.
„Ние сме секогаш тука за да помогнеме. И во иднина ќе бидеме на располагања каква било непогода да се случи во Прилеп. Дел од луѓето кои помогнаа не се тука денеска да добијат благодарници од оправдани причини, се надевам дека и тие ќе добијат по еден ваков скромен гест на благодарност од локалната самоуправа“, вели Дејви Спиркоски, навивачка група „Мајмуни“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.