Daily news
Богата програма на „Синедејс“
На деветтиот ден на 16. Фестивал на европски филм „Синедејс“ денеска ќе бидат прикажани филмови во кината „Милениум“ и „Фросина“ и во „Џебното кино“.
Во кино „Милениум“ во 20 часот ќе биде прикажан „Обликот на водата“ – спиритуална бајка, сместена во Америка, во времето на Студената војна, некаде околу 1962 год. Во тајната владина лабораторија со безбедност од највисок степен каде што работи, осамената Елиса е заробена во живот во изолација. Животот на Елиса засекогаш се менува кога таа и нејзината колешка Зелда ќе откријат таен класифициран експеримент.
Во 22 часот ќе биде прикажан „Другата страна на надежта“. Калид пристига на пристаништето во Хелсинки сокриен во контејнер за јаглен бегајќи од војната во Сирија за да побара азил во Финска. Зачуден и фрустриран од монолитната администрација на којашто ќе наиде во прифатниот центар, решава да побегне и се упатува кон улиците на Хелсинки. Таму го запознава Викстром, поранешен продавач на кошули, кој неодамна ја оставил својата жена алкохоличарка и почнал нов живот како ерген и сопственик на ресторан. Заедно, тие си помагаат еден на друг за да се справат со неволјите со кои ќе се соочат во овие непознати и честопати збунувачки нови светови.
Во кино „Фросина“ во 19 часот ќе биде прикажан „Горски принц“, приказна за исклучително надарен тинејџер, кој само што почнал да студира физика на факултет. Тој работи на теоријата на паралелни светови, за кои првично верува дека се поврзани со светлина. Тој има извонреден ум и ранета душа, која неговата авторитарна мајка, којашто управува со неговиот живот, не е способна да ја залечи.
Во 21 часот ќе биде прикажан „Ветар“. Шеснаесетгодишната Мина го минува летото со татко ѝ Андреј, на устието на реката Бојана. Андреј е кајтсурфер и авантурист, а Мина се обидува да биде сосема спротивното. Меѓутоа, се вљубува во кајсурферот Саша. Саша е постар од неа и има девојка – Соња. Неколкуте дена што Мина и Саша ги поминуваат заедно се чини дека не менуваат ништо во нивната врска. Но, во адолесцентскиот свет на Мина, овие денови менуваат сè.
Во „Џебно кино“ во 20 часот ќе биде прикажан „Штрак! Психо-духовната мантра на рокот“. Многу добро ви се познати легендарните кадри од Боуви, Иги Поп, Блонди, Фреди Меркјури, и оние класични опаковки за албуми (Transformer, Raw Power, Queen II, End of the Century) – е па време е да го запознаете човекот што стои зад ова. Овој филм на Барнаби Клеј за фотографот Мик Рок го следи самиот уметник којшто ја води публиката низ децениите минати фотографирајќи глам, панк и добри старомодни рокенрол легенди на сцена, а истовремено и како им помагал околу нивниот имиџ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.