Daily news
Богов: Домашното задолжување не е опасно
„Македонија има можност за солиден инвестициски рејтинг во наредниот период, за разлика од изминатата година кога имаше политичката криза и таа негативно влијаеше на економските параметри“, рече гувернерот Димитар Богов при презентирањето на годишниот извештај на Народната банка во Собранието.
„Економската ситација е добра, но, сепак, не е идеална. Она од што се плашат инвеститорите е политичката неизвесност и неизвесноста околу евроинтеграциите. Доколку се стабилизираат овие два параметри, во наредните две до три години може да имаме значајно раздвижување на економијата во однос на инвестициите и граѓаните ќе можат да го почувствуваат бенефитот од нив“, рече гувернерот Богов.
Тој додава дека токму поради кризата, Македонија ќе ја заокружи 2107 година со економски раст од 2,5 проценти, наспроти проектираните 3,2. И во оваа пригода Богов рече дека јавниот долг не е алармантен, а државата се вбројува во ниско задолжени земји во регионот.
„Надворешниот долг според параметрите на Народната банка е 35% од БДП. Остатокот од вкупниот долг од 46% отпаѓа на домашниот долг, кој го пресметува Министерството за финансии. Сметам дека задолжувањето кај домашните банки не е опасно. Банките се стабилни и ликвидни. Би му советувал на Министерството за финансии да продолжи со оваа пракса“, рече Богов.
Пратеникот од редовите на СДСМ упати критика до гувернерот Димитар Богов, кој во досегашниот мандат молчеливо се однесувал кон политиките на владите предводени од ВМРО-ДПМНЕ.
„Гувернере Богов, сметам дека можевте со Ваша интервенција, погласно зборување да влијаете на одредени одлуки. Бевте молчеливи кога се издаваше еврообврзницата, за субвенционирањето на инвестициите во ТИРЗ зоните, за јавниот долг.“
Богов ги отфрли обвинувањата и рече дека секогаш бил јасен и транспарентен и предупредувал за последниците од економското опкружување.
„Еврообврзницата не ја издава гувернерот, тоа е владина одлука, се носи политички. Ако Владата реши да се задолжи, ќе се задолжи. Сега, доколку одлучи да прави фискална консолидација, но и тоа е нејзина одлука и се прави со проектирање на буџетот. Сум бил дел од тие роуд-шоуа затоа што присуството на гувернерот е со цел да даде попрецизни информации на инвеститорите кои ги бараат и не може да ги најдат за држава како Македонија. Инвестициите во последните години го зголемија процентот на извоз. Педесет отсто од извозот се должи токму на овие инвестиции“, појасни Богов.
Богов рече дека нема точна информација за вкупните загуби од минатогодишното шпекулирање за девалвација на денарот во однос на еврото, но информираше дека граѓаните изгубиле околу 4 милиони евра на камати при конвертирање од денари во евра.
Гувернерот ги предупреди граѓаните да бидат внимателни и со тргување со крипто валутите.Тој рече дека биткоионот е реален, но поради анонимност при плаќање може да биде искористен за криминал и перење пари.
Габриела Д. Мишевска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.