Daily news
(ВИДЕО) Со 7-годишно дете три години живеат без струја
На светскиот ден за борба против сиромаштијата семејството Јовановски од скопската населба 11 Октомври се бори да го преживее денот. Ноќе како да не живеат. Три години во нивната куќа нема струја оти немаат пари да ја плаќаат. Тричленото семејство се навикнало обврските да ги завршува додека е ден. Најмногу внимаваат на домашните задачи на седумгодишниот Давид.
„Ако ни остане нешто за навечер, пишуваме на свеќа. Се плашам дека ќе му го расипеме видот“, вели Светлана.
Долгот за струја им е над 200.000 денари. Додека бил жив свекор ѝ, примал пензија и некако успевале да ја плаќаат струјата, но откако починал, имаат само колку за леб, сè друго им е луксуз. Освен свеќи, имаат и неколку светилки на соларна енергија. Преку ден ги полнат закачени на сонце во дворот за навечер да може да обележат каде им се вратите од вецето и од спалната.
За капење топлат вода во голем лонец. Им го дале соседите за не се мачат со мали тенџериња.
Топлат вода и готват на шпорет на дрва во дневната соба. И во најголемите горештини Светлана вели дека морала да пали оган за да зготви нешто за јадење. А за јадење, вели таа, имаат само по неколку дена во месецот. Нејзиниот сопруг Ласте работи. Платата му е 10.000 денари, а отплаќаат стар кредит од 3.000 денари, па преживуваат со она што останува.
„Кога ќе потрошиме сè што имаме, се снаоѓаме. Ни помагаат соседите, а сопругот еднаш неделно оди кај ‘Мајка Тереза’ на улицата Македонија и зема јадење, поинаку не можеме“, вели Светлана.
Целиот двор им е затрупан со остатоци од мебел, штици, федери од стари кревети, душеци, расипани машини за перење, нафтени печки, а почнале да собираат и старо железо. Сакаат да соберат колку можат повеќе, па да го однесат во отпад за да земат пари. Некоја невладина организација, која во последно време често ги посетува и им носи храна, им ветила дека ќе им обезбеди превоз до отпадите. Чекајќи го превозот, го затрупале дворот, а затрупани со стар мебел и штици им се и сите соби во куќата. Од страв да не останат без дрва за греење, го наполниле и подрумот во кој, како што вели Светлана, не се влегува.
Таа е невработена. Работела во печатница, но пропаднала фирмата и таа останала и без она малку што го заработувала. Кога се обидела да најде нова работа, не успеала, а сега дома ја задржуваат обврските кон Давид.
Според последните податоци од Државниот завод за статистика, семејството Јовановски е само дел од 445.200 лица што живеат во сиромаштија во Македонија. Стапката на сиромаштија во Македонија е 21,5 отсто. За сиромашни се сметаат самци што имаат годишни примања пониски од 78.362 денари, а четиричлено семејство со две малолетни деца се смета за сиромашно ако има примања пониски од 164.560 денари.
Овие податоци се однесуваат на 2015 година. Годишниот извештај за минатата година Државниот завод најави дека ќе го објави на крајот на месецот.
Денес на улицата Македонија втора година по ред здружението „Проект среќа“ го одбележа меѓународниот ден за борба против сиромаштијата, а во организација на невладината организација „Мрдни со прст“ денес на пет локации во Скопје се отворени пунктови за донирање храна.
М.И.П.
Камера: Тони Кузмановски/Монтажа: Бојан Ефремов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.