Daily news
(ВИДЕО) Според бугарски оценки, и Груевски да се врати на власт, договорот ќе остане
Бугарските новинари, за разлика од македонските, за Договорот за пријателство, добрососедство и соработка потпишан денес имаа само позитивни гледања.
Според Виктор Иванов од „24 Часа“, крајно време беше да се стави потпис на овој документ.
„Има некои, како да кажам, глупави луѓе кои се противат зошто во договорот пишува дека се потпишува на македонски јазик. Но, тоа е во смисла дека и во Бугарија има Миленковци“, вели Иванов.
Според него, негативните реакции нема да сменат ништо, бидејќи и Груевски да се врати на власта, нема да го отфрли.
„Сум бил на преговори кога тој бил преговарач околу договорот. Ја следев и посетата на вашиот претседател на Софија кога договорот беше тема.Според мене, внатре во него реално не пишува ништо. Тој е само добра основа двете земји да продолжат по патот. Крајно време е да живееме мирно“, оценува Иванов, додавајќи дека двете страни никогаш немале непријателски став кон спријателувањето.
„Имам многу пријатели Македонци со кои немавме проблем околу тоа ќе има ли или не договор. Да си живееме тивко и мирно. Најголема полза за двете држави е Македонија да влезе во ЕУ“, рече тој.
Тонја Димитрова од Бугарска национална телевизија смета дека потпиушаниот договор за пријателство и соработка е еден од најголемите успеси на бугарската надворешна политика. Таа нагласи дека 18 години траеја преговорите за склучување на договорот, а за Балканот е многу важно сите земји да бидат дел од евроатлантското семејство, членки на НАТО и на ЕУ, да не заглават во спиралата на политички кризи, да бидат стабилни и да ги споделуваат заедничките демократски и европски вредности.
Според неа, во Бугарија има едногласност околу договорот.
„Не постои политичка партија или политичка сила која не го поддржува потпишувањето на овој договор. Расположенијата во Македонија се следат многу од блиску. Ние новинарите ги следиме многу од блиску. Клучен момент е кога договорот ќе биде ратификуван во Парламентот. Се надеваме Македонија вистински да тргне на евроатлантскиот пат, да се зближи со соседите, да гради со нив добрососедски односи. Ова е многу добар почеток на градење на навистина блиски односи меѓу двете држави.
Ја следиме ситуацијата и се надеваме дека разумот ќе проработи кога договорот ќе влезе во Парламентот на Македонија“, изјави Димитрова за „Макфакс“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.