Daily news
(ВИДЕО) Затуроска: Владата на СДС ги запира сите проекти за гасификација
Лилјана Затуроска од ВМРО-ДПМНЕ обвини дека предлог-буџетот на СДС во делот за енергетиката покажува оти власта нема никаков план за развој на овој сектор. Како што вели таа, кога СДС е на власт енергетиката и енергетските капацитети се оставаат на забот на времето.
„СДС за 2018 година не предвидува средства за изградба на нови термо блокови, ниту, пак, инвестиции во нови јагленокопи со што би се продолжил животниот век на постоечките капацитети. Додека ВМРО-ДПМНЕ управуваше со државата беше предвидено изградба на термоелектрана во Делчевско и нов јагленокоп во Битолско за потребите на РЕК Битола. СДС покажува дека нема долгорочен план за енергетиката. СДС со своето кратење во сектор енергетика прави од Македонија енергетски зависна држава во делот на производството на струја, енергенс кој ако Владата продолжи вака ќе мораме да го увезуваме во сè поголем процент.
Јавноста и медиумите прашуваат дали неинвестирањето во енергетиката всушност е тенденциозно и е предизвикано од други причини? Дали владата одработува за компаниите на Анѓушев кои се увозници на струја и кои би имале и книжеле милионски профити од зголемениот увоз?“ вели Затуроска
Затуроска исто така обвинува дека новата Влада ги запрела сите проекти за гасификација.
„До сега поголем дел од нив требаше да бидат во финална фаза. Новата влада го стопираше и проектот за гасоводно поврзување со терминалите со нашиот јужен сосед. Прашањето е од каде ќе донесат гас и по која цена, а најважно кога тоа ќе го направат. Со новиот предлог-буџет СДС ја запира и гасификацијата на Република Македонија, во новиот буџет да се предвидува само довршување на кракот Тетово-Гостивар почнат од ВМРО-ДПМНЕ и Неготино-Битола“, истакна Затуроска.
Владата, нагласи Затуроска, не предвидела ни средства за изградба на мали хидроцентрали, кои се основен модел на искористување на хидропотенцијалот на помалите водотеци, а не се предвидени ни средства за производство на енергија на други алтернативни начини.
СДС нема стратегија и концепт за развој на енергетиката. Политиките на СДС со новиот предлог-буџет не се насочени кон граѓаните туку кон фирмите увозници на струја, граѓаните од политиките на СДС за 2018 година ќе имаат само поголеми сметки за струја, порача Затуроска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.