Daily news
(ВИДЕО) Лилјана Поповска: Бевме доследни во борбата, методите на ВМРО се страшни, но не се плашиме
Пратеничката и претседателка на партијата ДОМ, Лилјана Поповска, вели дека тие се „виновни“ што е намалено загадувањето, а, пак, во иста насока биле и сегашните борби што ги воделе против отворање рудници.
„Секогаш сме реагирале, не постои значително место во Скопје на кое не сме реагирале при сеча на дрвја. Но, тука стојат големите мечки, заедно со големата урбана мафија. При секое реагирање имавме страшни притисоци, закани, редица напади, но и најави за тужби. Ние секогаш се темелиме на факти и докази, па ако сака некој да тужи, нека го направи тоа, но гарантирам дека ќе изгуби“, вели Лилјана Поповска.
Претседателката на ДОМ вели дека моќта го променила односот на ВМРО-ДПМНЕ кон коалициските партии. Таа потсети и на нивното самостојно излегување на локалните избори во 2014 година, одлука која била изгласана на конгресот на партијата, а требала да биде најава за ВМРО-ДПМНЕ дека ДОМ излегува од коалицијата.
„На почетокот, кога влеговме во коалицијата на ВМРО-ДПМНЕ, имавме договорени програмски платформи кои се реализираа. Редица закони за животната средина беа усвоени и реализирани. Во текот на едни преговори беше избришана од план нуклеарната централа која требаше да се гради, беше намален данокот за туризмот од 18 на 5 посто. Со текот на времето, како што раснеше моќта на големата партија, а на изборите се добиваа се поголеми делови од моќта, така очигледно нешто се менуваше во односот кон партнерите и односот кон граѓаните“, додава Поповска.
Според претседателката Поповска, ДОМ биле казнети што излегле од коалицијата, а бомбите на СДСМ откриле на кој начин функионирала сегашната најголема опозициска партија, ВМРО-ДПМНЕ.
„Бомбите открија дека се функционирало од горе па надоле, и тоа беше поразително. Во такви ситуации размислуваш каков чекор да направиш. Бидејќи немавме удел ниту во ‘местење’ избори, ниту во злоупотреба на закони во која било смисла, ние моравме да се дистанцираме“, вели Поповска.
На прашањето дали ДОМ сега се плаши од ВМРО-ДПМНЕ, Поповска одговори со контра-прашање „Зошто да се плашам?“, потенцирајќи дека ако постоело такво чувство, тие сè уште ќе биле во коалиција.
„СДСМ ни понудија да настапиме заеднички, иако ние се подготвувавме за самостоен настап. Но, откако ни укажаа дека можеме да ги поделиме гласовите, сметавме дека треба сите заедно, независно од етничка, верска и идеолошка припадност, да застанеме во тој фронт. Бевме доследни во таа борба иако во меѓувреме многу наши луѓе останаа без работа, некои завршија во затвор, некои добија кривични пријави, други беа уценувани, малтретирани до тој степен што внук на наш член не беше запишан во градинка затоа што неговиот чичко останал лојален на ДОМ“, вели Лилјана Поповска.
Според неа, методите на ВМРО-ДПМНЕ се неприфатливи и никој не треба да ги прави. Во однос на унапредувањето на ЛГБТ правата, Поповска вели дека ДОМ како партија на зелените секогаш го поддржувала овој чекор и дека тоа така ќе остане.
Кристијан Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.