Daily news
Во Македонија околу 13.9 отсто од населението е со хронично бубрежно оштетување
Центарот за дијализа „Диамед Македонија“ денеска го одбележа својот 4. роденден со организација на стручна конференција по повод Светскиот ден на бубрегот. Годинава овој ден се совпадна со Светскиот ден на жената – 8 Март и поради тоа конференцијата е насловена како „Бубрезите и здравјето на жените“.
Според Менче Неделкоска, доктор во Центарот за дијализа „Диамед Македонија“, повеќете луѓе со хронична бубрежна болест немаат симптоми бидејќи телото може да толерира значително намалување на бубрежната функција. „Присуството на ХББ може да остане недијагностицирано долго време. Единствен начин е да се направи процена на ГФР на бубрезите и тест на урината за присуство на албумин со што се проценува оштетувањето на бубрезите. Некои симптоми за бубрежно заболување кај жените се зголемен замор, недостиг на концентрација, слаб апетит, несоница, ноќни грчеви во мускули, отоци околу очите и нозете, сува кожа, чешање и често мокрење“, вели Неделкоска.
Хронично бубрежната болест е светски проблем со несакан резултат и предвремена смрт. Зафаќа околу 195 милиони жени и е 8. водечка причина за смрт кај жените, со приближно 600.000 смртни случаи годишно. Ризикот за развој е подеднаков висок кај мажите и кај жените. Според некои студии, ХББ поверојатно е да се развие кај жените отколку кај мажите со просечна преваленца од 14 отсто кај жените и 12 отсто кај мажите.
Според доктор Оливера Стојчева од Универзитетската клиника за нефрологија, меѓу 11 и 16 отсто од луѓето во светот имаат хронична бубрежна болест, која е подмолна и болните не се свесни за болеста. Во Македонија студијата покажа дека околу 13.9 отсто од населението има хронично бубрежно оштетување. Со тек на време, по неколку години дури и декади, болеста прогредира до терминална фаза. „Постојат едноставни рутински тестови за навремено детектирање на болестите. Се мери креатининот во крвта, се калкулира бубрежната функција и се мери излачувањето на албумин. Треба примарно да дејстувуваме и да не дозволиме да дојде до хронично оштетување. Доколку дојде до оштетување, тогаш да влијаеме на факторите“, вели Стојчева.
Таа препорачува редовно вежбање, неупотребување аналгетици без рецепт, контролирање на тежината, правење прегледи еднаш годишно, консумирање здрава храна, запознавање на медицинската историја на семејството, мерење на крвниот притисок и холестерол, научете повеќе за бубрежните болести, не пушете, не земајте прекумерно алкохол и направете лекарски преглед доколку сте со ризик за хронично бубрежни болести.
За директорот на „Диамед Македонија“, Вера Иванова, изминатите четири години биле сериозен предизвик да се подобри стандардот и условите за лекување на пациентите со бубрежни заболувања. „Како здравствена установа, напорно работиме да воспоставиме одлични услови за лекување на пациентите со бубрежни болести. Навистина, се трудиме да им го олесниме лекувањето на самите пациенти, но и да им помогнеме на семејствата кои имаат вакви пациенти. Вложуваме напори да го подобриме квалитетот на живот на болните со современа медицинска и лекарска грижа и терапија, индивидуално водење и следење на секој пациент. Оваа година нашиот фокус е на жените во согласност со Светскиот ден на бубрегот и Меѓународното здружение на нефролози. Сепак, сите заедно правиме разлика“, вели Вера Иванова од Центарот за дијализа „Диамед Македонија“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.