Daily news
Вработените во „Фени“ охрабрени од појавата на инвеститори во фабриката
Претставници од банките заедно со дел од заинтересираните инвеститори за купување на „Фени“ утрово влегоа во фабриката. Тие прават увид во состојбата на „Фени“ со цел да направат понуда за купување на металуршкиот комбинат, во кој веќе трет месец е сопрен производниот процес поради огромни долгови.
Банките ја најавија посетата и побараа непречен пристап во фабриката стравувајќи дека може да наидат на опструкции, но утрово пристапот им беше овозможен.
Вработените во „Фени“ се охрабрени од тоа што во фабриката се појавиле заинтересирани инвеститори.
„Дотерани луѓе со актовки влегоа во ‘Фени’. Беше голема група и никој не им го попречи патот, влегоа без проблем. Изгледаа многу сериозно, а нам ни влеаја надеж дека има решение за нашата мака. Последна исплатена плата ни е септемвриската, а веќе истекува ноември. Овде луѓето живеат од месец за месец, нема резерви. Сите сме со кредити, па тоа што некој е заинтересиран за нас многу ни значи“, велат вработени во „Фени“.
Пецо Ристовски, претседател на Синдикатот на вработените во индустријата, енергетиката и рударството, вели дека октомвриската плата за вработените во „Фени“ е голем проблем.
„Платата законски треба да ја исплати сегашниот директор Рајчо Кацаров. Претставници од синдикатот постојано се на преговори со него за исплата на платата, но засега немаме ништо конкретно. Нема најава за исплата на октомвриската плата“, вели Ристовски.
Според него, денес увид во состојбата на „Фени“ правеле банките заедно со претставници на швајцарски фонд заинтересиран за фабриката, а ќе следуваат и посети од британски фонд и од француско-израелска компанија заинтересирани за инвестирање во комбинатот. Ристовски вели дека за фабриката сè уште е заинтересирана и бугарската компанија „Енекод“.
„Заедно со бугарски ‘Енекод’, заинтересирани за ‘Фени’ се четворица инвеститори. Два фонда, швајцарскиот, кој денес беше во ‘Фени’, и уште еден британски фонд, француско-израелска компанија и бугарски ‘Енекод’. Планот е инвеститорите да завршат со увидите до 29 ноември кога е закажано рочиштето за стечај“, вели Ристовски.
Вчера банките кредитори кога го најавија увидот во „Фени“ открија само дека заинтересираните инвеститори се од Европа, а не ја исклучија можноста и за повторни преговори со бугарски „Енекод“ доколку добијат сериозна понуда која ќе содржи издржан план за реструктуирање на фабриката и повторно стартување на производниот процес.
На 29 ноември судот во Велес треба да расправа за можноста за отворање стечај за „Фени“. Ова ќе биде втор обид на овој суд да ја почне постапката откако на 13 номеври на првото рочиште директорот на „Фени“ пред почетокот на судењето побара изземање на судот со барање тоа да се одржи во некој скопски суд оти банките се од Скопје. Врховниот суд го отфрли барањето и повторно го врати предметот во Основниот суд во Велес.
Стечај за „Фени“ иницираа банките кредитори на комбинатот поради долг што надминува 60 милиони евра, од кои 40 милиони кон нив, и 20 милиони евра кон други доверители.
(М.И.П.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.