Daily news
Галичка свадба: Продолжува негувањето на автентичната традиција
Се очекува повеќе од пет илјади посетители од земјава и странство да присуствуваат на годинешното 44. издание на манифестацијата „Галичка свадба“ која ќе се одржи на 15 (сабота) и 16 јули (недела) во селото Галичник на планината Бистра.
Оваа година судбоносното „Да“ во живописниот Галичник ќе го кажат невестата Тања Чаловска и зетот Бошко Лепчески. Во текот на двата дена од манифестацијата, посетителите ќе имаат уникатна можност да бидат сведоци на над триесет автентични свадбарски обичаи и ритуали проследени со изворни свадбарски песни карактеристични за овој крај од Македонија.
Традиционално, почетокот на свадбата се означува во сабота со поставување на свадбарското знаме, како и симболичниот чин на „фрлање“ три пушки од куќата на зетот (вила „Доста“). Церемонијата на венчавање на младенците ќе се изврши в недела, во монументалниот храм „Св. Апостол Петар и Павле“ во селото, а манифестацијата ќе заврши со чинот на испраќање на тапанџиите и зурлаџиите.
Особено впечатлив белег на целата манифестација претставуваат колоритните носии на сите учесници во свадбената свеченост. Всушност, поседувањето на автентична галичка носија е единствениот услов за учество во „Галичка свадба“. Со својата уникатност се издвојува невестинската носија, на која преовладуваат белата, жолтата и црвената боја и на која доминира богатиот вез распореден на ракавите и на предниот дел од кошулата. Составен дел од невестинската носија е и накитот изработен со филигранска прецизност и уникатни златни и сребрени елементи. Интересен податок е дека невестинската носија може да тежи и до 30 килограми.
Со оригиналните свадбарски обичаи и адети, народните песни и ора, манифестацијата „Галичка свадба“ придонесува за сочувување, негување и афирмација на автентичниот фолклор, традиција, карактерстичната архитектурата и целокупното богато културно наследство на овој крај од Македонија. Дополнително, „Галичката свадба“ е своевиден македонски туристички бренд кој е составен дел од многу туристички проспекти и понудата на тур-операторите.
Исполнувањето на ваквата мисија на оваа манифестација нема да биде возможно доколку не е поддршката од нејзините партнери и помагатели кои и оваа година се во голем број. Меѓу нив се: Министерството за култура, Универзитетот за туризам и менаџмент од Скопје, Пиварница Скопје, Комерцијална банка АД Скопје, ЕВН Македонија, Вода Маја, Технокомерц, Неотел, Халкбанка, Греемак груп, Клиника Жан Митрев, ГП Дабар, Општина Маврово и Ростуше, Национален парк Маврово и други.
Инаку, со одржувањето на манифестацијата „Галичка свадба“ веќе 26 години се отвора „Галичкото културно лето“ во чии рамки се предвидени и други настани, како што се ликовни колонии, изложби, книжевни средби и друго.
Организатор на „Галичка свадба“ и другите настани во рамки на „Галичкото културно лето“ е месната заедница на селото Галичник, која и оваа година се погрижи сите посетители да имаат можност да уживаат во убавината и да ја почувствуваат автентичноста на настанот. Во таа насока е и апелот до сите посетители да го почитуваат специјалниот сообраќаен режим кој ќе биде воспоставен во деновите на одржување на манифестацијата.
Поради ограничените просторни можности на селото и потребите поврзани со одржувањето на „Галичка свадба“, движењето со моторни возила во селото ќе биде ограничено. Постетителите ќе можат да ги паркираат своите возила на фудбалското игралиште пред селото, по што за сите заинтересирани ќе биде организиран превоз со минибуси до влезот на Галичник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.