Daily news
Димитров на разговори во ОБСЕ
Министерот за надворешни работи, Никола Димитров, денеска се обрати пред постојаните претставници на земјите-учеснички во ОБСЕ во рамки на сесијата на Постојаниот совет на организацијата. Во рамките на своето отворено и позитивно обраќање, Димитров го претстави оптимизмот кој завладеа во македонското општество по долгата криза, но и пораснатите очекувања на граѓаните како од новата влада, така и од меѓународната заедница во насока на долгоочекуваната реализација на аспирациите за евроатлантска интеграција.
Притоа министерот ја нагласи важноста од искреното соочување со предизвиците кои постојат во едно општество и во тој контекст ја елаборираше реформската агенда содржана во планот на владата 3-6-9.
Димитров беше реалистичен дека преточувањата на амбициозните планови нема да претставува лесен чекор, додавајќи дека ниту една голема и суштински позитивна амбиција не е лесна. Министерот пренесе силна решеност да се искористи новата шанса за конечно етаблирање на Македонија во семејството на развиените демократски општества.
Говорејќи поконкретно за преземањата и плановите на домашен план во поединечни области како: владеење на правото, изборен систем, силни, професионални институции, развој на здрави механизми на контрола, особено независно судство и слобода на медиуми, министерот се повика и на цитат од американскиот дипломат Адлај Стивенсон: „Слободните медиуми се мајка на сите слободи и на нашиот слободен напредок”.
Исто така министерот даде приказ и на новата визија при негување на односите со соседите и потребата од развивање пријателства и меѓусебно разбирање.
Обраќањето предизвика забележителен интерес, како од аспект на суштината така и од аспект на непосредниот и искрен пристап, а воедно беше поздравено од повеќе делегации, при што главните пораки беа со позитивен и охрабрувачки призвук. Дискусиите околу реформските амбиции на домашен план и надворешните аспирации на Македонија продолжија и за време на работниот ручек со група амбасадори на земји-учеснички во ОБСЕ и други меѓународни претставници, организиран во чест на министерот од страна на австриското претседателство со организацијата.
Министерот Никола Димитров за време на работната посета на ОБСЕ оствари средба со генералниот секретар на оганизацијата, Томас Гремингер, а воедно оствари и кусо видување со специјалниот претставник на ОБСЕ за слобода на медиумите, Харлем Дезир, при што беа разменети мислења за идни активности, меѓусебната соработка и поддршка за реформските заложби на владата.
Во рамки на работниот престој на Виена, министерот се сретна и со генералниот секретар во Министерството за надворешни работи на Австрија, Михаел Линхарт. На средбата стана збор за повеќе прашања од интерес на двете земји како: одличните билатерални односи, економската соработка, актуелните случувања на домашен план во двете земји, како и случувањата пошироко во регионот, гледишта околу миграциите и соработката меѓу двете земји во текот на мигрантската и бегалската криза во изминатите две години, Берлинскиот процес и приоритетите и плановите на австриското претседавање со Советот на ЕУ во втората половина на 2018 година. Димитров, заблагодарувајќи се за досегашната поддршка од Австрија во контекст на европските аспирации на земјата, изрази надеж дека истата ќе продолжи и во иднина, за што беше изразено силно уверување од австриска страна, за која проширувањето на ЕУ ќе биде високо на агендата во рамки на нивното претседавање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.