Daily news
„ЕВН Македонија“ го отвори првиот инфо-центар во ГТЦ во Скопје
Корисниците на „ЕВН Македонија“, почнувајќи од денес, имаат можност да ги користат услугите на првиот инфо-центар кој е лоциран на најфреквентната локација во Скопје, односно Градскиот трговски центар. Инфо-центарот на ЕВН претставува изложбен простор во кој корисниците ќе може да се информираат за сите услуги на компанијата. Центарот ќе овозможува и презентација на мултимедијални содржини од особено значење за корисниците, како совети за рационално користење на електричната енергија.
Преку современ терминал корисниците лесно и едноставно ќе може да вршат безготовински уплати на сите долгови во системот за сопствениот број на корисник/матичен број. Уплатите ќе може да се вршат како за фактури така и за други долгови поврзани со нив, на брз и сигурен начин со добивање соодветна потврда за тоа. Исто, така преку овој терминал корисниците ќе може да добијат и копија од својата сметка преку внесување на сопствените податоци – во хартиена форма.
„’ЕВН Македонија’, следејќи ги трендовите на дигиталната ера, на своите корисници веќе одамна им нуди можност за користење онлајн-услуги за олеснување на плаќањето. Сите корисници може ги добијат електронски фактурите за електрична енергија на својата електронска пошта, а плаќањето може да го извршат преку интернет-страницата на „ЕВН Македонија“. Сите информации поврзани со потрошувачката може да ги добијат и телефонски преку нашиот контакт-центар. Но, ние ја разбираме потребата на корисниците за човечки контакт во процесот на услужување и затоа го развивме и го отворивме инфо-центарот во Градскиот трговски центар во Скопје, место каде што корисниците може лично да се информираат за сите услуги и поволности што „ЕВН Македонија“ ги нуди“, рече Штефан Петер, претседател на Управниот одбор на „ЕВН Македонија“.
Во инфо-центарот нема да може да се поднесуваат документи за конкретна услуга или процес, но може да добијат целосни информации за услугата или процесот, да подигнат соодветна документација, како и да бидат упатени на конкретната услужна точка за реализирање на бараната услуга. Единствен исклучок во делот на поднесување на документација е поднесување документи за ажурирање лични и контакт-податоци. Во блиска иднина планирано е во инфо-центарот корисниците да може да набават уникатни продукти поврзани со енергетската ефикасност, како и услуги за целосно реализирање проекти од истата област. Инфо-центарот вклучува и забавен интерактивен дел, каде што и децата и младите посетители ќе може да го поминат своето време добивајќи корисни совети и презентација на темите поврзани со електричната енергија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.