Daily news
Заев: Ќе потпишеме десет нови договори со Бугарија
Важно е да гледаме на перспективите и да градиме пријателство и со соседите, порача првиот човек на Владата, Зоран Заев од Струмица, каде што имаше свое обраќање во рамките на обуката за политички лидери во организација на Институтот за политика од Република Бугарија.
„Многу е важно да гледаме на перспективите и да градиме пријателство и со соседите, притоа штитејќи ги своите позиции и остварувајќи ја својата улога во општеството“, изјави Заев.
Тој ја потенцира важноста од продлабочувањето на пријателството и соработката со Бугарија и додаде дека политичарите честопати не ги гледаат единството и блискоста на граѓаните на двете земји.
„Сакам денеска првин да кажам дека јас сум пријател на Бугарија. Мојата Влада е голем пријател на Бугарија. И нашиот народ е голем пријател на бугарскиот народ. Луѓето ни се блиски, имаме заеднички семејства, пријатели, младите стапуваат во брак заедно, буквално тоа секојдневно функционира“, истакна премиерот.
Тој информира дека во таа насока е и одржувањето на заедничката седница на Владите на Македонија и на Бугарија во Струмица на 23 ноември.
„Ќе отвориме нови договори, десет, што ќе се потпишат. Од сите тие договори не сме свесни, можеби секој од нас, секој граѓанин од Бугарија и од Македонија ќе има своја полза, придобивки, можеби повеќе пари, отворање нов бизнис, нови културни соработки, спортски соработки, како и соработки во областа на образованието, туризмот, енергетиката, сè со цел подобрување на севкупната економија“, изјави Заев.
Обраќајќи им се на присутните, премиерот истакна дека покрај власта што ја има најголемата одговорност пред граѓаните, општествена одговорност има и опозицијата, кој, освен конструктивност, треба да покаже и критичност.
„Јас би сакал и кај нас во Македонија и власта и опозицијата да стојат зад ваквите важни документи, што отвораат не само пријателство туку и големо сојузништво помеѓу Бугарија и Македонија, сè со цел да им се помогне на граѓаните на Македонија во интегративниот процес за членство во Европската Унија и НАТО“, рече Заев додавајќи дека тоа е посебно важно затоа што од 1 јануари, сè до крајот на јуни, Бугарија претседава со Европската Унија.
Тој истакна дека претседателствувањето на Бугарија е афирмација не само за неа туку и за Македонија затоа што првпат од 2003 година повторно ќе се одржува самит на ЕУ за Западен Балкан.
„Овој важен настан уште еднаш ќе ја испрати пораката дека ние, земјите од Балканот, кои сè уште не сме членки на Европската Унија, ја гледаме нашата иднина и нашата перспектива во ЕУ“, рече Заев.
Премиерот му се заблагодари на организаторот на настанот за поканата и изрази надеж дека собирот ќе помогне во иднина да се изградат млади перспективни лидери, кои ќе ја храбрат цела Европа во градењето перспективност.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.