Daily news
„Земјата од иднината” најдобар на осмиот „Мобил фестивал“
Осмото издание на „Мобил фестивал“ успешно заврши синоќа во Кинотеката на Македонија, со доделувањето на наградите за најдобрите филмови снимени со мобилен телефон. Млада публика, меѓу кои беа авторите на филмовите, но и љубители на седмата уметност и креативните форми со кои таа се создава, заеднички ги проследија странските и домашните филмови што пристигнаа на нашата адреса на конкурсот за филм снимен со мобилен.
Четиричлено жири ги избра најдобрите автори во пет категории. За наградите одлучуваа режисерите Марија Џиџева, Саша Станишиќ, Лабеата Рамизи и Блерина Гоче од Албанија.
Фестивалот, кој го организира продукцијата „КТ филм и медиа“, годинава се одржа благодарение на поддршката од Агенцијата за филм на Република Македонија, Град Скопје и Кинотеката на Македонија. Во рамките на осмото издание беа одржани две работилници, во Скопје и во Битола. Во соработка со гимназијата Никола Карев од Скопје и С.О.С. Детско село дваесетина основци и средношколци учеа за стоп-анимација и сработија куси видеа, кои исто така беа прикажани на главната вечер.
Филмот „Земја од иднината” на младиот Берат Ахметај ја освои наградата за млади таленти „Ратка Илиевска – Лале“. Жирито му ја додели оваа награда „поради искрениот и отворен пристап, со храбро мешање на различни медиуми и средства, каде можеме да ја препознаеме младешката енергија и талент потребни за иден филмаџиј“. Ахметај, кој е ученик во СЕТУГС „Михајло Пупин” од Скопје доби стипендија од Универзитетот за аудиовизуелни уметности ЕСРА. Нему и на неговите соученици од скопското училиште со кои го снимија филмот „Го сакам Скопје“ (I love Skopje), Мобил фестивал им додели VR-маски за мобилен. Истата награда ја доби и Филип Лафазановски, авторот на филмот „Да се биде лист“ (To be a leaf).
Наградата за најдобар странски филм ја добија филмовите „When he was, when he went“ на иранскиот автор Араш Поурнамдаријан и „Тhe story of the motorbike“ на авторот Јункинг Дуанму од Кина. Во еден постомодернистички манир режисерот создал омаж на познатиот ирански режисер, но истовремено раскажува и една топла човечка приказна. Тоа го прави преку едноставни изразни и технички средства, стои во образложението за иранскиот филм. Доблест на вториот награден филм е владеењето на филмскиот јазик, а режисерот со чисти филмски средства раскажува носталгична приказна која допира до секого.
Наградата за најинвентивен филм ја доби „Peripherals“ на Бенџамин Рејбоун од Велика Британија. Признанието го доби за инвентивноста на користењето на различни аудиовизелни средства (мобилен телефон, двоглед, фотографија, звучни записи) во градење еден емотивен свет, каде се брише границата помеѓу личното и јавното.
Награда за најоригинална приказна ја доби „Anyu or how Stálin lost his nose“ на Лина Валде од Германија, заради оригиналиот начин во комбинирањето на повеќе медиуми и филмски форми. Филм во кој се испреплетуваат документарното, фикцијата и анимираното. А тоа е во функција на филмската приказна, вели жирито. Најоригинална приказна има и филмот „Head over heels“ на Леонид Григурко од Русија. Тој е награден поради вештото користење на внатрешна монтажа преку која режисерот успева во еден кадар и една минута да влезе во светот на една тинејџерка.
Награда за најдобра идеја доби Давид Лоренц од Германија за филмот „Selfie“, за едноставна и ефектна идеја во која режисерот успева да прикаже љубовна приказна користејќи го еден од најизвиканите модерни феномени поврзани со мобилен телефон, селфито. Со истата награда беше награден и Доминго Гонзалес за филмот „28 август“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.