Daily news
Инвестиции и нови капацитети во индустриската зона Жабени
По барање на фабриката „Кронберг и Шуберт“, Општина Битола започна со реализација на проектот за изградба на пристап до фабриката од нејзината десна страна. Фабриката веќе се проширува и за нови 1.500 вработувања.
„Според најновата информација од вчера, тука се вработени 4.400 наши граѓани, така што ние веднаш се согласивме и пристапивме кон градежни активности во овој дел на ИЗ Жабени затоа што ќе им треба пристап, а пристапот од левата страна не им е доволен за да ги прифати сите вработени од сите смени. Се работи за завршена атмосферска канализација во должина од 170 метри, која е поврзана со другиот дел од атмосферската канализација, како и коловоз во должина во 660 метри и паркинг-простор. Вкупната вредност на инвестицијата изнесува 13.500.000 денари“, изјави градоначалникот на општина Битола, Владимир Талески.
Градоначалникот Талески потсети дека инвестициите во индустриската зона Жабени продолжуваат да се реализираат со зголемен интензитет:
„Во првите два мандата некои од медиумите знаеја да нè обвинат дека гледале сончогледови полиња, но како што забележувате, тука нема таква работа. Напротив, има два објекта кои веќе се почнати да се градат, третиот ќе почне на почетокот од овој дел, а од другата страна, каде што имаме пристап, има тројца инвеститори кои веќе го купија земјиштето и чии проекти се веќе во фаза на изработка. Вкупната инвестиција што Општина Битола досега ја има вложено во индустриската зона Жабени е над 290.000.000 денари, односно 4.780.000 евра. Сето тоа го правевме затоа што сме првите што понудивме максимални услови за инвеститорите бидејќи ценевме дека еден од главните приоритети што се покажа на нашите анкети уште во првиот мандат беше невработеноста. Бевме убедени дека правиме добро дело и еве резултатите се покажуваат денес затоа што вработувањата од ден на ден се зголемуваат“, додаде Талески.
Со постојаното проширување на фабриката „Кронберг и Шуберт“ во зоната веќе се врши приближување кон проектираната бројка на корисници во изградените капацитети во зоната, која изнесува 5.000.
На денешната прес-конференција директорот на индустриската зона Жабени, Сашо Илковски, информира дека во изминатите две години во зоната градежни парцели имаат купено турската фирма „Челмак“, грчката „Цереметал“ и италијанската „Натуралија фуд“. На последниот повик од Општина Битола интерес покажа и домашна компанија која планира производство на термоизолациони панели и за изградба на својот капацитет купи земјиште од 2.500 квадратни метри, а во изминатите три месеци со градба започнаа и две домашни компании „Фалко“ и „Еуроинженеринг“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.