Daily news
Уште два дена до првиот рок – СЈО отвори 20 истраги и поднесе 3 обвиненија
Тимот на специјалната јавна обвинителка Катица Јанева има уште дваесетина дена за отворање истраги и поднесување обвиненија за криминални активности, кои произлегуваат од прислушуваните материјали. На СЈО му истече првиот рок во кој обвинителите можеа да поднесуваат обвиненија, за предметите кои ги презедоа на 4 декември 2015 година.
Обвинителството на Јанева предметите и материјалите од Јавното обвинителство и од СДСМ ги презеде на двапати: на 4 декември 2015 година и на 30 декември 2015 година. Основното јавно обвинителство за гонење организиран криминал и корупција и Основното јавно обвинителство на 4 декември 2015 година, на СЈО му предадоа вкупно 31 предмет од незаконското прислушување, а Јанева и нејзиниот тим добија и случаи од обвинителствата во Битола и во Куманово. На 15 декември 2015 година, специјалната јавна обвинителка соопшти дека СЈО е надлежно и ќе работи по 34 предмети, вклучувајќи го и случајот „Пуч“. На 30 декември 2015 година, пак, лидерот на СДСМ, Зоран Заев, на СЈО му ги предаде сите материјали, снимки и транскрипти од „бомбите“.
Јанева веднаш се откажа од предметот против екс-премиерот Никола Груевски за злоупотреба на службена, воена или државна тајна во случајот „Пуч“ за ПИ мерките, со кои во јавноста произлегоа видео-снимки со лидерот на СДСМ Зоран Заев, а направени во кабинетот на Груевски. СЈО се прогласи за ненеадлжно и за предметот на членот на ДИК, Бедредин Ибраими, кој против СДСМ поднел пријава за лажно пријавување, кога бил сослушан како сведок во друг предмет од бомбите.
Законот за СЈО, предвидува дека ова обвинителство има 18 месеци од „преземањето на предметите“ за отворање или затворање на истраги и на обвиненија. Според ова, Јанева до почетокот, до крајот на јуни годинава има рок за истраги и за поднесување обвиненија, за случаите преземени на 30 декември. Во досегашниот период од една година, СЈО отвори 20 истраги и поднесе само две обвиненија и еден обвинителен акт. Станува збор за случаите: „Таргет“, „Титаник“, „Тортура“, „ТНТ“, „Транспортер„, „Тврдина“, „Тврдина 2“, „Трезор“, „Топлик“, „Тендери“, „Тарифа“, „Тенк“, „Труст“, „Табла“, „Триста“, „Тотал“, „Тифани“, „Траекторија“, „Тревник“, „Талир“, во кој се осомничени или обвинети десетици актуелни и поранешни државни и локални функционери за серија кривични дела.
Според ставот 3 од членот 1, Законот за СЈО ќе биде на сила пет години од усвојувањето од Собранието и може да се продолжува еднаш годишно, со одлука донесена со двотретинско мнозинство од пратениците.
СЈО и опозицијата бараат пролонгирање на овој рок, а за тоа е потребно двотретинско мнозинство во Собранието, кое со актуелниот распоред на пратеничките места е невозможно да се постигне.
Дел од стручната јавност смета дека со законското ограничување од 18 месеци за покренување обвиненија, обвинителите на СЈО не се во рамноправна положба со обвинителите на Јавното обвинителство. Рокот за покренување на обвинение и за обвинителите на ЈО е 18 месеци, но откако ќе почне истрагата, a за обвинителите на СЈО во овој рок од 18 месеци влегува и периодот на предистражна постапка.
Специјалната јавна обвинителка, Катица Јанева, на последната прес-конференција, побара од Собранието да го продолжи рокот од 18 месеци кој го има СЈО да поднесува обвиненија и да отвора истраги поврзани со прислушуваните разговори.
„Во врска со рокот од 18 месеци за поднесување обвиненија и објавување истраги, бараме од новото парламентарно мнозинство да го избрише членот 22 од законот за обвинителството со што ќе му овозможи на СЈО докрај да ги истражи кривичните дела што произлегуваат од прислушуваните разговори“, рече Јанева. Таа изјави дека не ги преслушуваат преостанатите 55% од прислушуваните разговори, затоа што во процес на обработка се преслушаните 45-те проценти и фокусот е ставен на отворените предмети и најави дека во наредниот период ќе се интензивира поднесувањето обвиненија.
В. Маглешов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.