Daily news
Како да препознаете труење од храна?
Најчести симптоми на труење со храна се мачнина, повраќање, дијареа, болки и грчеви во стомакот. Сепак, во зависност од тоа од која бактерија се заразени, тие можат да варираат. Научете да ги препознаете најчестите причинители за тровање:
Ботулизам
Отежнат говор, голтање и дишење
Замаглен вид
Мачнина
Сува уста
Замор
Парализа
Ботулизам може да се добие од мед, зеленчук, конзервирана храна, месо, риба, овошје и меко сирење.
Периодот на инкубација е од 12 до 36 часа.
Клстридиум перфрингенс
Овој тип на труење со храна се добива од недоволно термички обработено месо. Предизвикува дијареа и грчеви во стомакот кои траат и до 12 часа, со период на инкубација кој трае од 8 до 22 часа.
Кампилобактерија
Тие кои конзумираат сурово месо и живина, контаминирана вода или непастеризирано млеко, можат да бидат заразени со кампилобактерија, која предизвикува дијареа, грозница и болки во стомакот, со период на инкубација кој трае од 2 до 7 дена. Симптомите траат околу пет дена.
Колера
Колерата најчесто се шири со пиење на вода, но и со јадење на морски плодови кои се контаминирани и со телесни излачувања на лица заразени со бактеријата Vibrio choleare.
Симптомите се:
Обилна течна дијареа, мачнина и повраќање, дехидрација, грозница и грчеви во стомакот.
Периодот на инкубација е главно од 12 до 24 часа.
Криптоспоридиоза
Се добива од недоволно зготвена храна, овошје и зеленчук и периодот на инкубација трање од 2 до 10 дена.
Симптомите се:
Обилна, водена дијареа, грчеви во стомакот, мачнина, повраќање, грозница и губење на килограми.
Хепатитис А
Хепатитис А е болест од нечисти раце, која го предизвикува вирусот, а симптомите вклучуваат:
Болки во стомакот, грозница, замор, жолтица. Периодот на лечење трае од 15 до 20 дена.
Листериоза
Лица кои јадат заразено меко сирење, непастеризирано млеко, можат да се заразат со опасна бактерија листерија.
Симптомите се слични на грип – грозница и болка во целото тело. Симптомите и периодот на инкубацијата траат од 2 дена до 3 месеци.
Салмонелоза
Ако јадете сурово или недоволно термички обработено месо, недоволно сварени јајца или мајонез од живи јајца, можете да добиете салмонелоза.
Симптомите се болки во стомакот, мачнина, дијареа, грозница, повраќање и главоболка. Периодот на инкубација трае од 8 часа до 7 дена.
Шигелоза
Оваа инфекција се пренесува од лице до лице преку контаминирана храна, пијалоци и предмети. Основни симптоми се дијареа, која содржи слуз и крв, мачнина, повраќање, грозница и грчеви во стомакот. Периодот на инкубацијата трае од 1 до 7 дена, а симптомите од 4 до 7 дена.
Најдобра шанса да ја избегнете е добро да ги миете рацете при подготовка на намирниците, да не пуштате домашни миленици, муви и штеточини блиску до намирниците, избегнувајте специјалитети со суво месо, чувајте ги намирниците во фрижидер и добро мијте ги свежите производи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.