Daily news
Карпош прослави 41 година постоење
Вчеравечер, во „Кинотека на Македонија“, свечено беше одбележана 41. годишнината од формирањето на Општина Карпош.
Во присуство на поранешни градоначалници од Општина Карпош, актуелни градоначалници од скопските општини, советници од актуелниот состав на Општина Карпош, како и советници од претходните мандати, и од општинската администрација, градоначалникот на Општина Карпош Стефан Богоев, и претседателот на Советот Душко Весковски, ја истакнаа благодарноста до сите претходни генерации на градоначалници кои ја управувале локалната самоуправа, советниците, како и до општинската администрација, велејќи дека секој од нив оставил траен белег во развојот на Општина Карпош.
Претседателот на Советот на Општина Карпош Душко Весковски потенцираше дека најголемиот коректор ќе бидат карпошани, и тој клучен фактор во ниту еден момент нема да се заборави. Претседателот на Советот на Општина Карпош, исто така нагласи дека вратите на Општината ќе бидат ширум отворени, за да гласот на карпошани биде секогаш ислушан и испочитуван.
Градоначалникот на Општина Карпош Стефан Богоев им се заблагодари на сите гости за присуството и нагласи дека му претставува особена чест и задоволство што зборува за Општината во која се родил, израснал и сега, по дадената доверба од своите сограѓани , ќе ја води во едно подобро утре, кон подобар живот за сите граѓани во неа.
– Во минатиот период многу работи ви ветив, за многу работи разговаравме, се договоривме. Внимателно ве слушав, и се обидов што е можно повеќе да вградам од вашите желби во својата програма за подобар Карпош. Ви ветив живот во Карпош, онаков каков што посакуваме, онаков каков што заслужуваме.Ние младите, велат, имаме оригинални идеи, храбри и ентузијастички. Но тоа, не ни е слабост. Напротив тоа ни е предност. Всушност отсекогаш иднината на Карпош била и е во младите, идните генерации кои допрва доаѓаат кои сакаат да го кажат својот план, својата програма. Јас цврсто верувам дека заедно со вас ќе успееме во таа мисија, категоричен беше градоначалникот на Општина Карпош Стефан Богоев.
Општинскиот татко потенцираше дека ги почитува претходните генерации на градоначалници , на советници, на администрацијата која со децении работела на подобрување на ликот на Карпош. Богоев напомена дека со советниците и покрај тоа што се разликуваат во идеите и идеологиите, имаат единствена желба: Карпош да биде поубаво и попросперитетно место за живеење.
На крајот, во духот на кажаното, најмладите жители на Карпош, ученичкиот хор од ООУ „ Лазо Трповски“ ја испејаа официјалната химна на Општина Карпош. По завршувањето на свечениот дел, присутните си го честитаа роденденот на Општината со пригоден коктел во фоајето на „Кинотеката на Македонија“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.