Daily news
Катранџиев: Велешани на 15 октомври ќе одлучат за стратегијата за бегалците
Петнаесетти октомври ќе биде ден кога граѓаните на Велес ќе донесат многу значајна одлука за својата иднина. На 15 октомври велешани ќе ја имаат можноста сами да дадат одговор дали се согласуваат со штетната стратегија за интеграција на бегалците и странците на Владата на СДСМ, велат од Општинскиот комитет на ВМРО-ДПМНЕ од Велес.
„И покрај апелите и барањата на граѓаните СДСМ да се откаже од погубната стратегија за интеграција на бегалците и покрај огромното противење на плановите за изградба на социјални станови за удомување мигранти, никој од Владата не ги праша граѓаните што мислат за овие нивни планови“, рече Живе Катранџиев од ОК ВМРО-ДПМНЕ Велес.
„Кога тоа не сакаше да го прави Владата, ќе го прави општината. Денеска пред граѓаните сакаме да соопштиме дека на вчерашната 74-та седница Советот на Општина Велес донесе одлука на 15 октомври да се спроведе референдум на локално ниво на прашањето: „Дали сте за населување и интеграција на мигранти на територијата на општина Велес?“ Референдумот ќе биде со обврзувачки карактер и ќе значи дека резултатите од него мора да се почитуваат“, истакна Катранџиев.
Тој нагласи дека одлуката на Советот да се распише референдум по ова прашање е одговор на барањата на граѓаните.
„Граѓаните сакаат тие, а не некои други, да одлучуваат дали на територијата на општина Велес ќе се дозволи населување мигранти. Граѓаните сакаат тие, а не Зоран Заев и СДСМ, да одлучуваат дали ќе се дозволи во Велес да се спроведува стратегијата на Владата за удомување, вработување, бесплатно образование, здравство и социјална заштита за мигрантите. Како советници на ВМРО-ДПМНЕ и коалицијата „За подобра Македонија“ сакаме јасно и гласно да порачаме дека никој освен велешани нема право да носи одлуки кои на долг рок ќе ја обликуваат иднината на општината. Никој не смее зад грбот на велешани да кова стратегии и спроведува акциски планови кои носат сериозни демографски, социоекономски и безбедносни ризици за граѓаните“, потенцира Катранџиев.
Вели дека водејќи се од овие принципи и застанувајќи цврсто зад интересите на граѓаните, советниците на коалицијата предводена од ВМРО-ДПМНЕ гласаа „за“ предлог-одлуката на 15 октомври да се спроведе референдум на прашањето: „Дали сте за населување и интеграција на мигранти на територијата на општина Велес?“
„За жал, наместо да се надминат себеси и да застанат со своите сограѓани, советниците на СДСМ одлучија да застанат зад Зоран Заев, Мила Царовска и нивните штетни и погубни политики. И покрај јавно изразените дискусии и заложби, кога дојде моментот на изјаснување, советниците на СДСМ, сите еден по еден, на поединечното изјаснување, не дадоа поддршка за одржување референдум во Велес. Наместо глас „за“, наместо заложба за својот град, велешани од СДСМ добија воздржаност. Со тоа СДСМ се воздржа да ги заштити граѓаните на Велес од нов бран мигранти, СДСМ се воздржа да ја заштити безбедноста и сигурноста на граѓаните, СДСМ се воздржа да ја заштити демографската структура на Велес, СДСМ се воздржа да им ги заштити работните места на работниците од Велес“, појаснува Катранџиев.
Според него, СДСМ не даде поддршка граѓаните да можат самостојно да одлучуваат дали на територијата на општина Велес ќе се населуваат бегалци и мигранти.
„ СДСМ на вчерашната седница на Советот одлучи дека одбраната на партиските стратегии им е поважна од одбраната на Велес. За разлика од нив, ВМРО-ДПМНЕ и коалицијата „За подобра Македонија“ застанаа цврсто зад барањата и интересите на граѓаните. Го направивме тоа вчера со донесување на одлуката за распишување референдум, а уште посилно тоа ќе го направиме на 15 октомври. Заедно со граѓаните на 15 октомври ќе изразиме силно „не“ за стратегијата за претворање на нашиот град во бегалски камп. „Не“ за населување и интеграција на мигранти на територијата на општина Велес“, рече Катранџиев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.