Daily news
Лопез херој на Лион, Јунајтед се провлече, Ајакс херојски во Глезенкирхен
Манчестер Јунајтед и Ајакс по продолженијата, а Лион по изведувањето на пенали изборија пласман во полуфиналето во Лига Европа, додека единствено Селта во 90 минути го завери својот пласман меѓу најдобрите четири тима во ова натпреварување.
Манчестер Јунајтед, најголемиот фаворит за титулата во Лига Европа, мораше да одигра дополнителни 30 минути за да се пласира во полуфиналето. Пласманот на „црвените ѓаволи“ во полуфиналето, го засени повредата на Ибрахимовиќ во 94.минута.
Натпреварот на „Олд Трафорд“ во регуларниот дел заврши 1:1, а головите ги постигнаа Мхитаријан за Јунајтед и Хани за Андерлехт. Откако во второто полувреме играчите на Јунајтед не реализираа неколку добри шанси за постигнување на гол, победникот го реши Рашфорд во 107 минута.
https://www.youtube.com/watch?v=3r33SZveKo8
Шалке го пречека Ајакс и со два гола во второто полувреме успеа да ја анулира предноста на гостите од првиот натпревар. Горецка и Бургшталер беа стрелци на головите. Ајакс последните десет минути од регуларниот дел и продолженијата ги одигра со играч помалку.
Шалке со човеке повеќе на теренот го постигна и третиот гол, во 101.минута стрелец беше Калиѓури. Десет минути подоцна со многу среќа резултатот го намали Фиргевер, а пласманот на Ајакс во полуфиналето го потврди Јунес во 120.минута.
Бешикташ и Лион во 120 минути одиграа 2:1, иако двата тима и во регуларниот дел и во продолженијата промашија неколку одлични шанси. Талиска го постигна првиот гол на натпреварот, израмни Лаказет, а потоа Талиска со својот втор гол го постави конечниот резултат 2:1.
Драмата во Истанбул кулминираше во пенал серијата, првите пет изведувачи во двата тима беа сигурни, резултатот беше израмнет и по шестата серија, потоа во седмата голлманот на Лион, Лопез го одбрани ударот на српскиот дефанзивец Тошиќ, а Жале од Лион шутираше над голот.
Лопез повоторно стапи на сцена во осмата серија кога го одбрани одбрани удаорт на хрватскиот дефанзивец Митровиќ, а потоа капитенот на Лион Гоналон беше прецизен за конечни 7:6 во пенал серијата.
https://www.youtube.com/watch?v=AZEZYvXRsYc
Селта во 90 минута го оставри најголемиот клупски успех, палсман во едно полуфинале во европските купови.
Шпанскиот тим по првиот меч имаше предност од 3:2, а во Генк Сисит ја зголеми таа разлика. Конечните 1:1 на овој меч ги постави Тросар.
Полуфиналните двојки во Лига Европа ќе бидат извлечени в петок во Нион. Првите полуфинални мечеви се играат на 4.мај, а реваншите се на програмата на 11.мај. Финалето е во Стокхолм на 24.мај. крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.