Daily news
Македонија топ тема за Могерини
Македонија е ургентна тема на министерскиот состанок на министрите на ЕУ во Малта денес, и иако не се очекува формална одлука бидејќи состанокот е неформален, таа треба да ја зацементира легитимноста на изборот на Талат Џафери како парламентарен спикер.
Иако, според дипломатски извори, имало некои резерви од Унгарија, Бугарија и Грција, тоа што го најави Федерика Могерини во првата реакција по настаните во Парламентот,треба да добие потврда од земјите членки на Унијата за да се отвори пат и за признавање на идната влада, сакале да го прифатат тоа ВМРО-ДПМНЕ или не. И без да биде прашана пред многуте новинари во Малта, Могерини го изнесе ставот за Македонија, порачувајќи дека она „што го видела во Скопје вчера е особено загрижувачко и многу вознемирувачко“.
„Насилството секогаш е неприфатливо, особено ако се случува куќата на демократијата, во Парламентот. Верувам дека сите во Скопје треба да ги следат уставните принципи, демократијата и да се обидат да ја извадат земјата од оваа сериозна криза која може да биде опасна“, изјави таа пред состанокот во Валета.
Дека ВМРО-ДПМНЕ ќе инсистира на нелегитимност на вчерашниот избор на Талат Џафери за спикер на Парламентот се виде од изјавата на министерот Никола Попоски, кој учествува на состанокот како министер на земјите кандидати.Попоски буквално беше нападнат од странските новинари кои го прашуваа за насилството во Парламентот, за блокадата на формирањето влада од страна на претседателот и дали некој ќе одговара за тоа.
„ Најпрво, Употребата на било какво насилството е неприфатлива. Тие што учествуваа треба да бидат изнесени пред правдата“, изјави Поповски .Како второ, треба да се вратиме на почитување на процедурите и на законите бидејќи тоа е единствен начин за стабилизирање и за мир на земјата. И трето, дијалогот е единствен начин да излеземе од оваа политичка криза која носи сериозни ризици“, изјави Попоски пред новинарите.
На забелешката дека некои од министрите на ЕУ барале да ни се затвори вратата во Унијата, Попоски одговори:
„Не мислам дека помалку евроинтеграција туку обратно повеќе е вистински одговор кој ќе донесе повеќе извесност за земјата“. .
Тој исто така оцени дека „институциите се тоие што треба да бидат одговорни за безбедноста, мирот и стабилноста на земјата“ во контекст на тоа кој требаше да ги спречи насилствата кои беа помогнати токму од нив. „Тоа треба да биде прв чекор. Втор треба да биде отворањето дијалог и гледањето во перспектива како да се надмине политичката криза без насилство и со почитување на правилата и процедурите“, дополни Попоски.
Запрашан кога ќе се формира влада и зошто таа се блокира, Попоски одговори дека тоа треба да биде „на линија со правилата и процедурите во Парламентот“, нешто што го повторуваше како универзален одговор на сите незгодни прашања, за да заклучи на крај дека во синоќешните настани во Парламентот тоа не се почитувало.
„Не ни требаат повеќе унилатерални потези туку стабилизирање на состојбата и владеење на правото“, порача тој, но кога му реплицираа новинарите со зборовите „па добро, зошто не дозволувате тоа да се случи“, рече дека имало веќе „легитимна дебата во Парламентот кога требало да дојде во фаза на заклучоци и на неа да се донесат одлуки како да се испочитува волјата на народот“.
Што би значело, според него, оваа маратонска расправа да заврши со признание дека ВМРО-ДПМНЕ победило на изборите. Запрашан повторно дали неговата партија ќе го прифати изборот на Џафери како спикер, повтори дека тој не бил според парламентарните процедури и законската рамка и како таков провоцира неизвесност.
„Не мислам дека ќе избереме било кого ако не ги следиме законските процедури. Инаку, сите ќе носат свои одлуки надвор од институциите“, рече тој практично отворајќи простор за неговата партија во иднина да се повика на ова и самата да си носи свои одлуки, ако и се одземе легитимитетот во власта.
И, по целтото тоа повикување на законитост, Попоски изјави дека изборот на нова влада треба да се случи ако е волја на народот. Но, рече тој, „треба да се знае дека Македонија има специфични политички обичаи и законски правила , а ова што се случи во Парламентот не беше во согласност со тие обичаи и законски процедури“.
„Алтернативата на тоа , рече Попоски, е секој да си пропишува свои правила што ќе доведе до хаос“. Крај/сј
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.