Daily news
Максути: Државата повеќе да инвестира во младите, во нивниот образовен процес и нивно мотивирање
Заменик-министерот за одбрана, Беким Максути, денеска учествуваше на завршната конференција на истражувачкиот проект на Евро-атлантскиот совет на Македонија, насловен „Зајакнување на младинскиот дијалог за промоција на демократските процеси во духот на евро-атлантските интеграции“.
Целта на проектот е да ги поттикне младите активно да учествуваат во градењето на демократските процеси и со тоа да придонесат во процесот на евро-атлантските интеграции, развивањето дијалог, градењето капацитети и вмрежувањето на младите и младинските организации. На отворањето на завршната конференција говореа премиерот Зоран Заев и претседателот на Собранието на Република Македонија, Талат Џафери.
Заменик-министерот Максути на првиот панел посветен на домашната институционална перспектива рече дека денес помалите држави во развој се соочуваат со сериозен проблем – младите својата визија и желбата за просперитетна иднина да ја бараат надвор од матичните држави.
„Потребно е државата повеќе да инвестира во младите, во нивниот образовен процес, во создавањето животни услови за подобра егзистенција, нивно мотивирање. Еден од условите е и интензивирање на дијалогот меѓу младите од сите провениенции, без разлика на нивната етничка, верска, социјална, политичка припадност“, истакна заменик-министерот. Додаде дека Македонија прави напори да донесе европски стандарди во образованието, одбранбениот и безбедносниот сектор, економијата, социјалниот живот.
Во контекст на евро-атлантските интеграции Максути посочи дека тие се значаен мотивирачки фактор за младите да можат слободно да се движат и да разменуваат идеи со нивните европски колеги. Ги презентираше и напорите на Министерството и на АРМ за привлекување на младите својата иднина и професија да ја најдат во редовите на Армијата.
„Министерството за одбрана покрена проект за запознавање на младите со воената професија и со можностите кои таа ги отвора. Во рамките на Проектот за популаризација на воениот позив, експерти од Министерството, Армијата и Воената академија ги посетија сите средни училишта и ги запознаа младите со воената професија“, рече Максути.
Тој истакна дека можностите и перспективите на младите значително ќе се подобрат со целосно интегрирање на Република Македонија во НАТО и во Европската Унија, процеси кои се стратешки цели на Владата и процеси кои сме на добар пат да ги оствариме.
Во рамките на истражувачкиот проект изминатите неколку месеци биле организирани четири тркалезни маси, а било спроведено и истражување на јавните ставови и мислења за ефектите од евро-атлантските интеграции, и активното вклучување на младите и младинските и студентски организации во демократските процеси и процесот на донесување одлуки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.