Daily news
Манчевски во Стразбур за реформите во администрацијата
Министерот за информатичко општество и администрација, Дамјан Манчевски, учествува на настанот во организација на Европскиот Комитет за демократско владеење, во рамки на Советот на Европа во Стразбур. Министерот Манчевски, со своето обраќање ја отвори првата сесија: „Промовирање на демократско владеење преку споделено искуство – реформи во администрацијата и локалната власт и реформата на ИКТ и јавната администрација“.
„Како резултат на политичката и демократската криза во државата, обновувањето на демократските процеси е главна заложба на нашата Влада. Сите наши заложби се во отворање на процесите за креирање на политики. Инклузивни и отворени процеси се наш статегиски приоритет, каде се слуша гласот на сите релевантни и засегнати страни. Тоа е случај и со креирањето на Стратегијата за реформа во јавната администрација, која е во правец на активностите кои државата ги презема на патот кон европската интеграција. Во овој процес се вклучени сите релевантни чинители, и не само затоа што ЕУ го бара тоа, туку затоа што е најдобриот пристап за нашите граѓани“, посочи министерот Манчевски, зборувајќи за предизвикот со кој се соочуваме во овој дел, ако се има во предвид партизацијата на јавната администрација од една страна и неинклузивните процеси за креирање на политики од друга.
„Владите во 21 век, се нешто сосема поразлично од тоа што претставувале век претходно. Процесот на владеење денес, го нарекувам Влада 2.0. Сакам да го користам овој технички термин, со оглед на мојата ИКТ позадина. Владите во минатото испорачуваа закони и го надгледуваа нивното имплементирање. Владите 2.0. имаат за задача да ги информираат граѓаните дека има определен проблем и да ги поканат заедно да дискутираат за надминување на проблемот, заедно да подготват решение. Во овие модерни времиња и со поддршка на ИКТ, ние лесно можеме да го постигнеме тоа. Интернетот не е оружје, и покрај таквите квалификации особено откако се соочуваме со проблемот на лажните вести. Интернетот е алатка, која може да се користи во правец на обезбедување на директна демократија. Вклучување на што поголем број на луѓе, во борба со екстремизмот и лажните вести“, истакна Манчевски.
Министерот Манчевски ги презентираше и заложбите на МИОА за деполитизирана, ефикасна, ефективна и отчетна јавна администрација, која обезбедува квалитетни, лесно достапни и поефтини услуги за граѓаните и на бизнисите. Јавна администрација базирана на европските принципи и вредности, која придонесува за одржлив економски развој, владеење на правото, социјална кохезија и просперитет.
„Во изминатите неколку месеци, МИОА интензивно работи и на ИКТ реформи, со цел развој на интероперабилноста и Е-услуги. Исто така, работиме на развивање на неколку стратегии во оваа сфера, како што се: стратегија за широкопојасен интернет, стратегија за сајбер безбедност и стратегија за отворени податоци“, информираше Манчевски, потенцирајќи ја важноста од дигитализацијата на процесите и услугите во јавната администрација, како една од главните алатки за борба со корупцијата во администрацијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.