Daily news
Манчевски: Со буџетот за 2018 година конечно ќе се обезбеди автономност за МРТ
Министерот за информатичко општество и администрација, Дамјан Манчевски, денеска го претстави буџетот за МИОА за следната година во рамките на серијата конференции посветени на образложување на прелог-буџетот.
Притоа Манчевски истакна дека вкупниот буџет на Министерството за в година изнесува 1.486.050.000 денари, што е зголемување од 3,5 пати во споредба со претходниот.
Сепак, како што најави, најголемиот дел од овие пари, односно 1.190.000.000 денари, ќе оди за финансирање на Македонската радио-телевизија, Македонска радиодифизија и Агенцијата за аудио и аудиовизуелни медиумски услуги.
„Со ова обезбедивме, пред сè, стабилно и независно финансирање на овие три фактори од радиодифузната дејност. Ова одржливо финансирање, конечно, на МРТ ќе ѝ даде шанса за развој на автономна и независна уредувачка политика“, истакна Манчевски.
Голем дел од стратешките проекти на Министерството за следната година се со поддршка на ЕУ и меѓународната заедница, а Манчевски најави дека со делот на буџетот од развојната програма, во вредност од 146.540.000 денари, МИОА ќе финансира неколку капитални проекти, меѓу кои и централниот електронски регистар на населението преку кој граѓаните ќе добијат сопствен електронски идентитет, со што ќе може да се идентификуваат и да добиваат електронски услуги од страна на институциите.
Во текот на 2018 година ќе биде пуштен во употреба и новиот национален портал за е-услуги, кој значително ќе го зголеми бројот на услуги што државата ќе им ги нуди на граѓаните по електронски пат.
Министерството в година ќе инвестира и во нова и побезбедна систем-сала, во која на едно место ќе се смести најголемиот дел од опремата во државна сопственост. Со тоа се очекува државата да оствари големи заштеди, кои може да се вложат во зголемување на опсегот на електронски услуги за граѓаните.
Манчевски најави дека ќе се работи и на надградба на постојната инфраструктура за администрацијата да биде побрза и поефикасна со цел граѓаните да добиваат подобри услуги.
„Во делот на реформата на администрацијата, генерално, можам да кажам дека фокусот на реформите во 2018 година ќе биде ставен во делот на дигитализацијата како клучен дел на која било реформа на администрација во 21 век“, истакна тој.
Притоа нагласи дека целта за модернизацијата и дигитализација на администрација не е само декларативна заложба, туку е реална посветеност на Министерството. Во буџетот за 2018 тоа е планирано да се постигне преку: стручни усовршувања и обуки на административните службеници, вложувања во стандарди за квалитет (ИСО) и управување со него (CAF).
Министерот за информатичко општество и администрација најави дека во текот на пролетта 2018 ќе биде домаќин на првиот историски ИТ-самит на земјите од Западен Балкан. Во Скопје ќе бидат присутни политичките лидери од Балканот и ЕУ, но и лидерите од ИТ-индустријата, како и на глобалните медиуми.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.