Daily news
МКЦ со бесплатен мултимедијален настан ќе го одбележи својот 45. роденден
На 18 јануари (четврток) во Младинскиот културен центар традиционално ќе се одржи мултимедијалниот настан, Роденден. Од МКЦ најавуваат настан со многу уметност, забава и дружење за кој влезот, како и секоја година, ќе биде бесплатен.
Во продолжение, за сите заинтересирани следува и подетално запознавање со програмата предвидена по повод 45. роденден на МКЦ:
Во Галерија МКЦ ќе биде поставена изложбата на фотографии „Гледај во позитив“. Во рамките на изложбата Наке Батев ќе се претстави со фотографии на тема „Втора шанса“, Томислав Георгиев со „EFFEGIES“ и Огнен Теофиловски со „И јас имам сон“.
Во Џебното кино ќе биде прикажан „Каде одат претставите што не се случуваат?“, авторски проект на Драгана Гунин, која воедно е и единствениот изведувач во перформансот. Станува збор за перформанс посветен на претставите што не се случиле, гледано низ призмата на театарски режисер и влијанието на политичката ситуација во работата.
Во кино „Фросина“ како и секоја година ќе се одржи поетскиот перформанс „Песнило“, на кој ќе се претстават млади поети. Настанот е куриран од Иван Шопов.
Покрај ова, во чест на роденденот на МКЦ, предвиден е и филмски маратон во киното „Милениум“, додека, пак, во планетариумот ќе се одржи настанот BLIND DATE, програма курирана од „Ако никој не свири“.
Како што информираат од МКЦ, во однос на музичката програма предвидени се настапи на:
„Обојени програм“ – бенд што постои речиси 4 децении и уште од првиот ден се наметнаа како состав со автентичен музички израз, а таа „автентичност“ не е лесно да се дефинира. Бранислав Бабиќ Кебра и „Обојени Програм“ преку својата музика ги канализираат The Fall, Joy Division, Slits, Raincoats… но, во текот на целото постоење успеваат да не звучат како некои од наведените. „Обојени програм“ се музички жанр сам за себе и нивната музика е неблагодарно да се споредува со кој било друг бенд.
„Милко“ е добро познат бенд на скопската публика. „Милко“ е бенд од западно Скопје формиран 2006 година од Сашо Митревски, Стефан Терпини и Никола Кузмановски. Претходно работат под името „Nicotine“ заедно со Милко Митровски, го снимаат изданието „Nicotine“, кое е објавено декември, 2010. Во моментов бендот работи на материјалот за новиот албум, па публиката ќе може да слушне нешто и од новиот материјал, а секако ќе бидат изведени и постарите хитови на овој одличен скопски бенд.
Младиот белградски бенд „Визељ“ по 2 најавени концерта во Скопје, доаѓаат под мотото „трета среќа“. Првиот пат требаше да настапат заедно со постарите колеги „Репетитор“, но поради здравствени причини не успеаја да гостуваат на тој концерт. Вторпат беа најавени на ПИН конференцијата 2017, но поради временски неприлики повторно не се качија на бината на МКЦ. Инаку, овој млад и надежен бенд, нивниот постар колега, Никола Врањкович, го опишува во една реченица како „бенд кој има нешто што го имаа Шарло и нешто што го имаше Азра во раниот период“.
„The Local Blue“ се инструментален рок бенд од Скопје. Формирани се во 2016 година. Во бендот свират Кристијан Новковски (тапани), Владимир Бичковски (бас) и Кристијан Савиќ (гитара). Како инспирација за својата музика ги наведуваат Clutch, Ali Farka Touré, Jimi Hendrix, Rage Against the Machine и многу други андерграунд стонер и сајкеледик артисти.
За во бифето на МКЦ, пак, е најавен целовечерен сет на диџејската екипа „Funky Fresh“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.