Daily news
Мнозинството уставни судии бара да се поведе постапка за членот на Законот за електронски комуникации
Широка двочасовна дускусија кај уставните судии за членот 175 од Законот за електронски комуникации, на денешната седница на Уставниот суд.
Судијката известител Вангелина Маркудова, предложи да се поведе постапка. Таа смета дека оспорениот член не регулира во кои случаи се оправдува отстапувањето од уставно загарантираното право на приватност и неповредливост на податоците. Подвлече дека постои опасност од незаконито и неуставно искористување на опремата за прислушување и може да доведе до загрзоување на уставно загарантираните права на граѓаните. На оваа линија се судиите: Исмаил Дарлишта, Наташа Габер, Гзиме Старова и Сали Мурати.
Малцинството судии сметаат дека само со судска наредба од судија на претходна постапка како и со образложено барање од јавен обвинител, тоа може да се дозволи бидејќи државните органи добиваат неконтролирана моќ за злоупотреби и неконтролирано прислушување. Претседателот Никоа Ивановски, Елена Гошева, и судијата Јован Јосифовски не гледаат ништо неуставно и образложуваат дека членот дава само технички насоки, додека со Законот за кривична постапка и други членови од Законот за следење на комуникациите е уредена постапката во кои случаи може да се прислушува.
Судиите кои застанаа зад иницијативата потсетија дека во 2010 година, Уставниот суд донел интервентна мерка со која поништил слична одредба, која во овој закон повторно е воведена. Дел од судиите се сомневаат и дека членот 176 , е неуставен. Судијата Јован Јосифовски најави дека има обврски на лекар, па за интерес на расправата се врати по 10 минути со објаснување дека ги одложил обврските.
Државната советничка Менка Траханова им одржа лекција на уставните судии, по барање на судијката известител Вангелина Маркудова, таа беше повикана да одговори на прашањата на судиите, што е невообичаена ситуација за овој суд. Повеќе од половина час, Трајанова онјаснуваше зошто во рефератот од 20- страници изнеле став да се поведе постапка. Таа потенцираше неколкупати дека мора да постои уставна основа во спорната одредба. Во одредбата се нагласува дека не е забрането следењето на комуникациите, доколку операторот обезбедил опрема без шумови. „Дали тоа значи дека ако секој човек може да биде затворен ако се обезбедат соодветни услови“, праша Трајанова. Во интерес на државата е вмешување во приватноста, но мора да има уставна основа, рече Трајанова. Дел од судиите ја нападнаа со прашања Трајанова, дека целата материја е деликатна, и дека ако се отстранела нормата, ќе се внел хаос во законодавството.
Моментално тече пауза, по која судиите ќе продолжат со седницата.
Г. Дувњак
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.