Daily news
„Мост“ регистрира повеќе неправилности и проблеми на гласачките места
Делење гласачки ливчиња, семејно гласање, расправии меѓу припадници на политички партии, фотографирање ливче, непочитување на гласачката процедура и проблеми при одвивање на гласањето, се само некои од нерегуларностите што ги забележа граѓанската асоцијација „Мост“ на денешното гласање.
Од „Мост“ велат дека досега ги забележале следните неправилности на гласачките места – на гласачкото место 0001 во општина Берово откинати биле 5 гласачки ливчиња заедно со серискиот број, по што бил направен записник за тоа и гласањето продолжило.
Во општина Аеродром на едно гласачко место на речиси 60 гласачи им биле дадени гласачки ливчиња заедно со серискиот број. По реакција на гласач, ИО започнал да ги откинува ливчињата без серискиот број. Дополнително, претседателот на ИО не соработувал со набљудувачот на „Мост“.
Во село Мојанци, општина Кочани, биле забележани 3 случаи на семејно гласање, во кои биле злоупотребени 6 гласа и избирачкиот одбор не реагирал.
На гласачкото место 2273, општина Штип, 7 гласачи не биле проверени со УВ-ламба. Дополнително, биле читани на глас имињата на гласачите.
На гласачкото место 1375, општина Прилеп, „Мост“ регистрирала дека гласач не можел да гласа зашто во избирачкиот список веќе имало потпис на неговото место. Откако гласачот си заминал, ИО увидел дека друг гласач со слично име по грешка се потпишал на неговото место. ИО не направил записник за ова.
На гласачкото место 2653, во Бардовци, општина Карпош, 4 гласачи не биле проверени со УВ-ламба.
Во општина Аеродром на гласачкото место 2715 еден гласач бил испрскан со невидливиот спреј пред да биде проверен во избирачкиот список. Гласачот на бил во избирачкиот список зашто не гласал на тоа гласачко место, па ИО не му дозволил да гласа. Гласачот потоа отишол на гласачкото место каде што треба да гласа, но тамошниот ИО не му дозволил да гласа.
На гласачкото место 2699, во општина Аеродром, до гласачките кутии пронајдено е заокружено ливче кое не било ни превиткано. Откако ИО го забележал, го прогласил за неважечко и го ставиле кај неискористените ливчиња бидејќи немале посебни пликови за да го спакуваат.
Во општина Чаир на еден гласач му било издадено едно ливче повеќе бидејќи било залепено со претходното. ИО побарал инструкција од ДИК по што ливчето било ставено во посебен плик.
На гласачкото место 2645, општина Карпош, на гласач му биле издадени 2 ливчиња за избор на градоначалник на град Скопје по што реагирал кај ИО, кој по проверка на кочанот со гласачки ливчиња забележал дека им недостигаат две ливчиња за градоначалник на општина и две ливчиња за градоначалник на град Скопје. Гласањето е прекинато, повикани се претседателот на ОИК Карпош и полицијата и направен е записник, регистрирале од „Мост“.
Организацијата регистрирала и повеќе проблеми со изборниот материјал.
На гласачкото место 1718, општина Струмица, во кочанот со гласачки ливчиња за градоначалник имало ливчиња за избор на градоначалник и совет на општина Велес. Гласањето било прекинато 15 минути.
На местото 2581/1 во општина Ѓорче Петров гласањето било прекинато 1 час и 45 минути поради тоа што во кочанот со гласачки ливчиња за избор на градоначалник имало и ливчиња за избор на совет. ИО известил дека ќе го продолжат гласањето за толку време колку што траел прекинот.
На местото 0962, село Жидилово, општина Крива Паланка, гласањето било прекинато во период од 15 минути поради тоа што УВ-ламбите не работеле.
На гласачките места во ОУ „Браќа Миладиновци“ во општина Аеродром имало проблеми во функционирањето на УВ-ламбите.
Од „Мост“ велат дека што се однесува до шаблонот со Брајова азбука, во општина Тетово и во општина Боговиње избирачките места не добиле ваков шаблон.
Регистрирани биле и проблеми предизвикани од неовластени лица. На гласачкото место 828 и 828/1, село Грешница, општина Кичево, партиски активист со уште 2-3 неовластени лица агитирал во објектот пред просториите во кои се сместени гласачките места.
На гласачкото место 1455, општина Прилеп, имало вербална расправија меѓу активисти на политички партии, а реагирала и полицијата и ја смирила ситуацијата.
На гласачкото место 1471, с. Дебреште, општина Долнени, имало присуство на неовластени лица пред гласачкото место. Полицијата реагирала и ги отстранила.
Пред ОУ„ Петар Здравковски – Пенко“ имало конфликт помеѓу неовластени лица. Полицијата навреме реагирала и ги отстранила од местото.
Во околината на ОУ „Браќа Рамиз и Хамид“ во општина Шуто Оризари се делеле прехранбени продукти од разни политички партии. Дополнително, бил лепен пропаганден материјал.
На гласачкото место 1720/1, општина Струмица, гласач го фотографирал гласачкото ливче, била повикана полиција, а ливчето не било ставено во кутијата.
На гласачкото место 2829, општина Чаир, гласач ги фотографирал ливчињата. ИО му ги одзел ливчињата и ги прогласил за неважечки.
На гласачкото место 2728, општина Аеродром, гласач заборавил едно гласачко ливче зад параванот, а во кутијата ставил 3 ливчиња. ИО забележал дека зад параванот има останато едно ливче, ја повикал ОИК, направиле записник, а ливчето го прогласиле за неважечко и го ставиле во посебен плик. Поради ова, гласањето било прекинато 15 минути.
На гласачкото место 2686, општина Аеродром, еден гласач ги ставил двете ливчиња за избор на градоначалник и совет заедно во една гласачка кутија. ИО ги повикал ОИК и полицијата и направиле записник. Гласањето било прекинато 30-ина минути, по што продолжило.
На гласачкото место 0307, општина Виница, најмалку 10 лица, откако гласале, пред гласачките кутии ги отвориле гласачките ливчиња за да видат во која гласачка кутија да ги стават и јасно можело да се види за кого гласале“, соопштија од организацијата „Мост“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.