Daily news
Осудени во „Калдрма“: 3000 евра за селекција на обвинети за притвор
Здружението Зелена лупа од Скопје одржа средба со 45 претставници од случајот „Калдрма “, во кој вработени на македонските патарини беа осудени дека со лажни фискални сметки ги присвојувале парите од наплатата на патарините.
Обвинетите се пожалија, сведочеа и доставија документација преку која се жалат дека притворени лица (во притворот во Битола) биле чувани во самица, во исклучително тешки случаи, што е спротивно на закон. Во притворот во Битола им биле давани блaнко листови со цел штелување на датумите за прием на решенијата за притвор. Начинот за селекција кој обвинет да биде притворен, а кому да биде одредена мерка куќен притвор бил врз база на тарифник – од 3000 до 7000 евра, па имало и случај за лице кое било во бегство да му биде доделена мерка домашен притвор.
Со цел да бидат осудени по член 353 за злоупотреба на службена положба и овластувања, 20 дена по притворањето, во притворот добиле решенија за промена на работниот однос, од јавни во државни службеници, а по пресудата повторно биле трансформирани во јавни службеници за да бидат избркани од работа. Во текот на постапката им било повредено правото на одбрана со недавање на записниците од претходното рочиште, со што биле спречени да се подготват за следно рочиште, за дури на крај на постапката да ги добијат сите записници наеднаш, по 8 месеци, кока најголем дел од нив не се ни сеќаваат што всушност било кажано на рочиштата.
На средбата беше речено дека во притворот во Битола Лидија Лазова била држена во самица, и во машки оддел, без да бидат обезбедени женски чувари, со што сериозно ги нарушиле нејзините човекови права. Во притворот немало воопшто парно на минус 28 степени Целзиусови, па Лидија била најсреќна кога некој чувар ќе ѝ донел шише со топла вода за да се стопли. Еден ден, во бањата, додека се туширала на екстремно ниски температури, во незатоплената притворска бања, Лидија се онесвестила и го скршила колкот. По операцијата, и покрај лекарското мислење дека мора да оди на бања за да заздрави колкот со 4 вградени шрафа, не ѝ било дозволено бањско лекување. Лидија до ден денешен трпи сериозни здравствени последици поради нечовечкиот третман.
Во текот на постапката обвинителниот акт бил менуван неколкупати, но истовремено се менувале и наодите од вештачењето кое било правено од бирото за судски вештачења со цел да се дојде до пресуда по секоја цена. На почетокот биле товарени за едни суми, па за втори, па за трети. Разликата е утврдена од бројката помеѓу преброените возила од сензорите по наплатните рампи, кои служат само за мерење на тежина, но не и на број на возила (за што има и допис од францускиот производител) и бројот на издадени фискални сметки. Без да биде утврден бројот на возила кои не подлежат на плаќање (полиција, армија, инвалиди и други категории возила кои не подлежат на плаќање), и без да биде утврдено кој од четворица во смена, дали и за колку возила не наплатил, произволно биле апсени и притворани, па од иста смена двајца биле апсени, а двајца оставани на работа.
По овој случај, преку создадената слика во јавноста дека многу се краде на наплатните рампи, обезбедувањето на сите наплатни рампи го презема СГС, и профитира милиони евра годишно, па постои сомнение дека осудените се колатерална штета заради бизнис интересите на поранешниот директор на УБК. Во пресудата исто така стоело и дека еден вработен работел без престан 72 часа, што е физички невозможно, а исто така дека друг работел 400 дена во годината, по математиките од вештачењето. Дополнително во пресудата пишувало и дека човек е осуден дека работел на една наплатна рампа, а осудениот за тој временски период работел на сосема друга наплатна рампа. Овие, и уште многу други прашања беа отворени на дебатата. Експертите ги сослушаа осудените и членовите на нивните семејства.
Донесен заклучок, по разгледувањето на целокупната долкументација, по 15 септември да се одржи нова дебата на која што ќе се договараат конкретни чекори како овие граѓани да дојдат до својата правда. На средбата присуствуваа Ване Цветанов, судијата во пензија и универзитетскиот професор Бранко Секуловски и обвинителот во пензија Ѓорги Настевски.
Највисоката казна од 6 години и три месеци му е изречена на првообвинетиот Ирфан Идризи, а најниската казна од 8 месеци затвор на изработувачот на лажните фискални сметки.
В. М.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.