Daily news
Отворени Зимските олимписки игри, двете Кореи дефилираа под едно знаме
Зимските олимписки игри беа отворени со раскошна двочасовна церемонија во Пјонгчанг, во Јужна Кореја. Речиси 3.000 спортисти од 92 земји продефилираа на свеченото отворање, а сите очи беа вперени во Северна и Јужна Кореја, кои годинава на отворањето дефилираа под исто знаме. Историски ќе биде и настапот на женскиот тим во хокеј, кој ќе биде составен од спортистки од Јужна и Северна Кореја.
Отворањето на игрите беше проследено со огромен интерес не само од страна на љубителите на спортот туку и од политичките аналитичари.
За настанот во јужнокорејскиот град пристигна висока делегација на Пјонгјанг, предводена од помалата сестра на севернокорејскиот лидер Ким Џонг-ун. Нејзиното присуство на отворањето на Игрите беше протолкувано како јасен сигнал за мировната иницијатива што Пјонгјанг ја најави пред неколку недели. Ова е прва посета од ваков вид на член на владејачкото семејство во Пјонгјанг по поделбата на полуостровот.
Потпретседателот на САД, Мајк Пенс, кој пристигна од Јапонија во Јужна Кореја за отворањето на Олимписките игри, пред само неколку дена вети нови санкции против Северна Кореја. Пенс, сепак, изјави дека не ја исклучува можноста за средба со севернокорејската делегација на Зимските олимписки игри во Јужна Кореја оваа недела прецизирајќи дека таа не е однапред договорена. За возврат од Пјонгјанг беа категорични дека немаат намера да се сретнат со американските власти за време на посетата во Јужна Кореја.
Иронично, сепак, американскиот потпретседател беше на само неколку чекори од севернокорејската делегација на церемонијата на отворањето на Игрите. Пенс и неговата сопруга Карен седнаа точно пред Севернокорејците, вклучувајќи ја и сестрата на лидерот на Пјонгјанг. Од прес-службата на Пенс потенцираа дека за време на церемонијата во Пјонгчанг немало интеракција меѓу потпретседателот на САД и севернокорејската делегација.
Vice President Mike Pence is sitting only a few feet away from Kim Yo Jong, who is the very powerful sister of North Korean dictator Kim Jong Un during the winter Olympics #OpeningCeremony in South Korea. The two don’t appear to have spoken to each other. pic.twitter.com/ZyZwFYou1W
— David Hookstead (@dhookstead) February 9, 2018
Отворањето го одбележаа и судири меѓу полицијата и демонстрантите во близина на стадионот. Јужнокорејските демонстранти побараа од САД да ја бомбардира Северна Кореја.
Во следните 17 дена 2.952 спортисти од 92 држави ќе се борат за освојување на медалите во 102 дисциплини во 15 спортови. Е.Т.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.