Daily news
Охрид СОС: Природното богатство не смее да се уништува поради лична корист
Граѓанската иницијатива Охрид СОС имаше свое обраќање на 41 седница на Комитетот за светско наследство на УНЕСКО во Краков, Полска каде што беше поканета да присуствува како единствена организација-набљудувач од РМ.
Освен што присуствуваше на Седницата, Охрид СОС учествуваше и на Форумот за светско наследство во опасност кој беше наменет за граѓански организации и беше во организација на World Heritage Watch. На Форумот присутните усвоија резолуции кои потоа беа официјално поднесени во Центарот за светско наследство. Оваа беше прва година кога на граѓански организации им беше дозволено да се обратат на Седницата на Комитетот за светско наследство на УНЕСКО и прва година кога на некој начин се оддава признание на улогата на граѓанскиот сектор поради што веројатноста е многу голема резолуциите усвоени на Форумот за граѓански организации да бидат делумно или целосно интегрирани во конечните одлуки на УНЕСКО.
Во одлуката на УНЕСКО по извештајот од Реактивната мисија која во земјава престојуваше во април годинава се налага надлежните во Македонија да се откажат од секциите „а“ и „е “од експресниот пат А3 и патот да се симне во подолна категорија. „Како што кажавме и на самото обраќање на 41 Седница – сметаме дека таквата формулација е несоодветна и апелираме до УНЕСКО да наложи целосно повлекување на проектот за експресниот пат. Воедно, бараме од актуелната Влада да се откаже од секакви идеи за патишта кои ќе поминуваат низ Националниот парк Галичица“, се вели во соопштението на Охрид СОС.
Во обраќањето на 41 Седница било споменато и Студенчишко Блато – односно потребата од негова итна и сеопфатна заштита како и ревитализација со што ќе се дозволи пределот да биде жариште на еко-туризмот, а да почне да се развива и научниот туризам – од природни науки, па сè до археологија во околината на блатото.
„Според нас е поразително што Македонија има само еден УНЕСКО локалитет и тоа веќе речиси 40 години. На 41 Седница на УНЕСКО беше прогласен за светско наследство појас на стара букова шума со заедничка апликација од Австрија, Албанија, Белгија, Бугарија, Германија, Италија, Полска, Романија, Словачка, Словенија, Украина, Хрватска, Шпанија. Македонија, како што може да се забележи, ја нема на оваа листа. Додека ние се бориме со сите сили да го заштитиме и да го зачуваме единственото УНЕСКО подрајче што го имаме, граѓанските движења во развиени земји даваат сè од себе своите да ги стават на Листата на светско наследство во опасност само поради една зграда или поради одобрен потенцијален проект, каков што е случајот со Виена и Ливерпул“, е ставот на навладината организација.
Според Охрид СОС свеста во Македонија, особено кај надлежните, е на исклучително ниско ниво. „Македонија изобилува со неверојатно богати природни предели кои ги задоволуваат и најригорозните светски критериуми. Не смееме да дозволиме да се продолжи со трендот бесценето природно богатство да се уништува поради нечија лична корист“, велат од организацијата.
Охрид СОС во моментов активно работи на прогласување на охридскиот регион за Рамсар локација, што е уште една титула која овој предел многу одамна ја има заслужено.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.