Daily news
Пари за културен казан – од славење на оризот до свадба на чело со англиската кралица
Силни реакции по објавувањето на годишната програма за култура. Негодувања, сомнителни одлуки, престрелки. Некои основани, некои не. Во историјата на независна Македонија и работата на сите министри за култура оваа програма никогаш не била идеално направена и секогаш имало незадоволни. Беше и ќе биде во функција да сервисира уметност, а власта да се фали.
Но, толку исвиркувања досега не добил никој, но не и затоа што програмата е толку скандалозна. Таа не е ниту подобра ниту полоша од онаа што сме навикнале да ја видиме. По принципот за секого по нешто, инцидентно има и издржани и квалитетни проекти. Буквално, препис да се задоволат апетитите на сите, и тоа од потребите на институциите до големите желби на досега неискажани уметници што првпат добиваат можност да работат. А да работат, сакаат сите, тоа е повеќе од јасно. Нов културен бран и култура за сите се заговараше на големо и, да, бранот нѐ поплави, а култура има баш за сите, речиси без никаков филтер.
Тоа што изненадува е чудното менаџирање на повиканите од Министерството на одговорите на поплаките од страна на незадоволните. Министерството за култура се декларира за отворено транспарентно и отчетно работење. И ова го почитува. Но, каква е разликата од претходната парадерка, која се појавуваше во јавност за да го соопшти главно она што е во нејзин интерес, и министер за култура што се оградува од сѐ и не објаснува ништо. Поточно, се иззема од одговорноста да каже што и да е. Комисиите биле независни во одлуките и ние треба да поверуваме дека критериумот на тројца луѓе пред чии прецизни очи ќе помине само тоа што е квалитетно или попластично кажано – повеќе од 1.000 ракописи во делот за издаваштво биле детално читани, се размислило за нив и насловите што добиле поддршка се токму тие што ја заслужуваат.
Кога во еден казан треба да минат проекти што се однесуваат на локални манифестации за ориз, свадба во Галичник, до големи театарски претстави, па манифестации на здруженија на граѓани, па проекти на заслужни фраери и фраерки, сликата изгледа вака.
Збунува и тоа што речиси сите добиле помалку отколку што побарале, дали е ова реална процена на потребните средства, дали тие што бараат се алчни или буџетот е празен?! Во маестралното дело на Бертолучи, „Нуеве ченто“, има сцена што кореспондира со барањето одговори и анализа на темава. По ослободувањето на локалното население, партизаните почнуваат со национализирање на имотот – гуски, овци, кој што има. Во сиот занес и сите ја слават слободата, но стоп-кадар и мајсторска гротеска – влетува жена што вреска: „Зошто баш мојата гуска да биде на сите?“ Така, сега слободата ја сакавме сите, се залагаме за еднаквост и праведност, ама кога тоа ќе удри во нашиот џеб, сликата се менува.
Да повториме за транспарентната работа на Министерството за култура и слободарскиот дух, да не очекуваат надлежните длабоко поклонување и црвен тепих, за неа се изборивме сите. Таа не е адут за да се провлекуваат грешки. Не е во ред за двајца театарски режисери да се одлее осмина од буџетот за театар, без оглед колку се тие добри, не е во ред издавачки проекти од пониска класа на неафирмирани издавачи да добијат национална поддршка само затоа што етничката статистика така налага, не е во ред процената дека приватен музички менаџер што работи пазарно е поважен од рок-енциклопедија, не е во ред кумановскиот театар да биде дискриминиран, барем половина од списанијата што се печатат со наши пари никој не ги видел, освен некои фиоки во институционални канцеларии. Локалните, пак, манифестации, како онаа за славење на оризот или некој сличен настан, се утврдило како пракса од минатото и тоа е сосема друга приказна.
Да, паѓаат покривите на барокните зданија и ова треба да се реши, пустош остана по квазикултурната политика. Тешко се санираат последиците од 11-годишното продавање ветар и магла, од кое се изродија клиенти и идолопоклоници на минатата власт. Но, оправдувања нема. Или ќе се почне со видливи оперативни резултати кои може да нѐ чинат и неколку хируршки интервенции, па реформите ќе бидат системски и ќе бидат многу бргу видливи или шоуто ќе продолжи – некои аутоф-гејм, некои ин.
Па, умно и креативно решение е да се основа агенција за книга, умно е да тргнат хибридните проекти во нова интердисциплинарна дејност, ама никако не е умно министерски службеници да се однесуваат како правни застапници, да ги замолчуваат оние што негодуваат со делумни или никакви објаснувања. Кој признава пола му се простува. Така, нека се каже како поминал проектот со детето што пее милитантни фолклорни песни, како фантомски здруженија ќе прават поетски манифестации. А по признанието, чекаме предлог за решение. Распределбата на проектите по принципот две третини за македонски и една третина за албански проекти на никој нема да му донесе ништо добро иако се порамнува со општиот политички амбиент. И не мачкајте очи дека нема заслужни уметници, нови миленици, маркетиншки пазарења и слично зашто шарената фасада на влезната врата треба да биде потсетник што не сакаме да ни се случи повторно. Сѐ се гледа, нели, на ваша и наша огромна радост?!
Ана Василевска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.