Daily news
По 15 години во подрум, 5200 наслови и 2000 магазини осветлени во библиотеката на МСУ
Правливи и заборавени една и пол деценија, 5200 наслови на антологиски стручни изданија, енциклопедии, монографии, каталози и 2000 магазини од областа на уметноста, собирани од далечната 1969 година, се вратени на полиците во адаптираната библиотека на Музејот на современа уметност, и од денеска се на располагање на студентите и сите други љубители на уметноста. Освен што тие 15 години биле во подрумот на институцијата, пред шест години се избришани од регистарот, како воопшто да не постоеле.
Причините зошто биле запоставени и дали некој едноставно не сакал да води сметка за нив, директорот на Музејот на современа уметност, Лазе Трипков, не ги знае, но вели дека еден од приоритетите му бил библиотеката и сите изданија да бидат повторно достапни за јавноста. Тој се надева дека фондот на изданијата наскоро ќе биде збогатен.
„Не знам зошто овие скапоцени изданија досега биле заборавени како непостоечки кога се вистинска истражувачка ризница. Побаравме помош од ресорното министерство, кое ни помогна во дел од активностите, но, за среќа, во пресрет ни излезе ‘Еуролинк’ и работата се заврши. Се надевам дека во иднина ќе успееме да прошириме повеќе вакви сродни дејности, освен примарната изложбена активност“, изјави Трипков на денешното отворање на библиотечниот оддел.
Оваа дата база е воедно најголемата за модерна и современа уметност во Македонија.
За Олга Костовска, претседател на Надзорниот одбор на „Еуролинк осигурување“, оваа донација на МСУ е прв чекор во долгорочната соработка на компанијата со оваа реномирана културна институција и е само најава за бројни активности кои ќе се реализираат годинава. Компанијата ќе вложи дополнителни 1.100.000 денари како генерален покровител на сите активности на МСУ за годинава. Инаку, донацијата е во рамки на платформата за корпоративна општествена одговорност на оваа компанија и е насочена кон образованието, културата и уметноста.
„Нашата компанија слави 15 години постоење и продолжува да дава придонес во зачувувањето на уметничкиот израз и прогресивниот дух на нашата заедница. Сакаме да придонесе во зачувување на трајни уметнички вредности како насока за идните генерации“, рече Костовска.
На отворањето присуствуваше и Елизабета Канчевска Милевска, која смета дека изложувањето на овие публикации и изданија е многу значајно заради едукативниот карактер. Таа нагласи дека во завршна фаза е доведен и издавачкиот проект за преводите на многу монографии и дела од областа на уметноста.
Музејот на современа уметност кон крајот на месецов (26 април) почнува со серија изложби насловена „Заборавени“, која ќе вклучи македонски ликовни уметници што живеат и творат во странство. Првата изложба од овој циклус е на Михајло Арсовски, дизајнер што работи во Хрватска. крај/мф/ав
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.