Daily news
Прилеп се подготвува за меѓународниот карневал „Прочка 2018“
Привршуваат подготовките за меѓународниот карневал „Прочка 2018“, којшто годинава го има своето 17 издание. Околу 1000 учесници и гости од повеќе држави ќе бидат дел од овој костимиран спектакл. Во официјалниот напреварувачки дел ќе учествуваат групи од: Македонија, Будва, Бања Ковиљача, Врњачка Бања, Лесковац, Белград, Бол, Шабац, Бела Црква, Корча, Перник, Мокриево, Куратица, Бегниште, Кавадарци, Ратево, Струмица, Радовиш.
Како увертира на карневалот е изложбата на маски, што ќе се постави во центарот за култура „Марко Цепенков“ на 16. февруари во петок. Детскиот карневал за учесници до 14 години ќе се одржи на 17 февруари во сабота. Во подготовките учествуваат сите основни училишта од Прилеп, со свои групни маски, со автентична кореографија.
На 18. февруари во недела, во центарот на градот ќе се одржи официјалниот натпреварувачки дел од карневалот, со почеток во 13:00ч. Учесниците ќе имаат свој настап пред бројната публика, но и жири комисијата, која што ќе ги избере најдобрите учесници по категории, коишто ќе добијат парични награди и дипломи од здружението „Прилепски мечкари“. Добитникот на Гран при наградата ќе добие парична награда од 18.000 денари.
Карневалот ќе го следи делегација на Европската федерација на карневалски градови, во присуство на претседателот Ван Дер Крон. На овој меѓународен маскенбал ќе присуствуваат и многу екипи од европски карневалски градови.
За сите официјални гости карневалската забава под маски, продолжува вечерта во 21:00ч. во ресторанот на хотел „Липа“.
Карневалот всушност се одржува ден, пред почетокот на велигденските пости во православната христијанска вера. Оттука и традицијата негувана со децении е вградена во овој туристички настан. Така на првиот ден по „Прочка“ поточно верскиот празник „Проштени поклади“, во понеделникот во манастирот „Свети Ѓорѓија“, здружението „Прилепски мечкари“ организираат ручек со посен грав.
Во прилепската традиција се негуваат сè уште семејните вечери на „Проштени поклади“, кога младите одат на гости и бараат прошка од повозрасните.
Маскирањето на „Проштени поклади“, има своја богата традиција на овие простори. Речиси сите дечиња се подготуваат за овој ден, родителите им шијат облеки, купуваат маски, имаат посебен мејк – ап, подготвуваат перформански за одредени ликови од приказните, од филмовите, Кон оваа традиција сè повеќе се приклучуваа и возрасните. Денес „Прочка“ е всушност празнување во градот, кое што има своја туристичка димензија. Освен гостите од бројни држави коишто се учесници на карневалското случување, за овој ден Прилеп, го посетуваат и многу граѓани од други градови во државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.