Daily news
Работниците се изборија, „Фени“ в понеделник ќе бира ново синдикално раководство
Кулминира незадоволството од сегашното раководство на синдикалната организација на кавадаречки „Фени индустри“. Сопирање на обидите за штрајк, злоупотреба со огревното дрво преку Синдикатот, притисоци во корист на бугарската компанија, непочитување на мислењето на вработените, донесување одлуки без согласност од вработените и ред други неправилности се на списокот на незадоволство од сегашното раководство на Синдикатот. Вработените успеаја за в понеделник да закажат собрание, на кое сакаат да го искажат незадоволството и да ја почнат постапката за избор на ново раководство.
„Со месеци се обидуваме да закажеме собрание на Синдикатот. Баравме од претседателот Ѓоре Палитов да закаже, но тој ги игнорираше нашите барања и покрај промените и лошата состојба во која е фабриката. Моравме сами да се организираме, да собираме потписи. Мнозинството членови на синдикалното собрание се потпишаа и го исполнивме условот да закажеме собрание и без претседателот. Тој ја изгуби поддршката од нас одамна оти се однесуваше како продолжена рака на бугарската компанија заинтересирана за ‘Фени’, а притисоците кои ги врши врз вработените сè уште не сопираат“, велат вработени во „Фени“.
В понеделник вработените се надеваат дека ќе успеат да изберат раководство кое ќе организира избори за нов претседател. Имаат четири точки на дневен ред, односно ќе расправаат за актуелната состојба во фабриката, за работата на синдикалните тела во изминатиот едногодишен период, третата точка е планирање на натамошните активности на Синдикатот во новонастанатите услови, а предвидена е и точка разно.
Вработените се жалат дека сегашното раководство ги задушило сите нивни обиди за штрајк, во периодот пред да престане производството и печката да се стави на минимум. Потсетуваат дека нивни колеги кои јавно ги кажувале ставовите се избркани од работа, а најголем револт велат дека Синдикатот предизвикал со огревното дрво кое не им беше доставено на вработените и покрај тоа што сумата во целост им била исплатена. Синдикалните дрва не стигнаа и по почетокот на грејната сеозна, а Синдикатот почна да им ги враќа парите пред дваесеттина дена.
„Луѓето одеа секој ден, молеа да им кажат кога ќе има дрва. Секој ден им кажуваа нови лаги, а студот стигна па мораа при платени дрва да се снаоѓаат за огрев“, велат вработените.
Според нив, од моментот кога закажале собрание, сегашното раководство преземало очајнички обиди да ги задржи позициите, правеле притисоци врз вработените, а кон некои биле упатени и закани за физички пресметки.
Претседателот Палитов не е достапен за да одговори на обвинувањата. Тој изминатиов период, додека вработените го обвинуваа, тврдеше дека обвинувањата дека е продолжена рака на бугарската компанија заинтересирана за „Фени“ се неосновани и изјавуваше дека има целосна поддршка од вработените.
Во судот во Велес е во тек стечајната постапка за фабриката преку која треба да се избере нов инвеститор. Од петте заинтересирани компании за „Фени“ со кои банките кредитори се во преговори, само швајцарскиот фонд ФОС Асет менаџмент депонираше три милиони евра како гаранција за сериозноста на понудата.
На 11 јануари во Велес треба да се одржи следното рочиште со собрание на доверители.
(М.И.П.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.