Daily news
Светски ден на населението: оснажување на луѓето и нациите во развој
Д-р Наталија Канем, в.д. извршен директор на УНФПА (Фонд за население на Обединетите нации), со порака за планирање на семејството.
Секој ден ранливите жени, особено сиромашните жени и жените-бегалци, се соочуваат со општествени, економски и географски пречки во однос на доброволните услуги и информации за планирање на семејството.
На денешен ден пред педесет години, тогашниот генерален секретар на Обединетите нации го основа УНФПА, Фондот за население на Обединетите нации, во вид на труст. И, од 1969 година, кога УНФПА почна со работа, па наваму, фондот помага во отстранувањето на пречките во планирањето на семејството и во овозможување на користењето на репродуктивните права од страна на жените. УНФПА придонесе кон тоа употребата на современи контрацептивни средства речиси да се удвои на светско ниво – од 36 проценти во 1970. на 64 отсто во 2016 година.
И покрај вонредниот напредок, и натаму остануваат огромни предизвици: на околу 214 милиони жени во земјите во развој им недостигаат безбедни и ефективни методи на планирање на семејството. Најголемиот дел од тие жени живеат во 69-те најсиромашни земји. Со задоволување на нивната неисполнета потреба би се спасиле животи и со тоа што би се спречиле 67 милиони случаи на несакана бременост и за една третина би се намалил проценетиот број смртни случаи на жени во текот на бременоста.
Подобрата нега на репродуктивното здравје, вклучително и доброволно планирање на семејството, може да им даде поттик на економиите и да придонесе кон одржлив развој така што ќе им овозможи на жените да го завршат своето образование, да се приклучат кон платената работна сила, да бидат попродуктивни на работните места, да заработуваат повисоки плати и да ги зголемат заштедите и инвестициите. Освен тоа, за секој дополнителен долар потрошен на контрацептивни услуги над сегашното ниво, цената на негата поврзана со бременост се намалува за $2,30.
Инвестициите во планирање на семејството помагаат во остварувањето просперитет за сите.
Според тоа, планирањето на семејството е од клучна важност во постигнувањето на одржливата развојна цел 1, искоренување на сиромаштијата. Тоа е, исто така, клучно и за остварување на другите цели, како што се искоренување на гладот и промовирање на здравјето и родовата еднаквост.
УНФПА си постави една амбициозна и трансформативна цел на искоренување на сите незадоволени потреби во врска со планирањето на семејството до 2030 година. На овој Светски ден на населението ги повикуваме сите влади и чинители да помогнат во остварувањето на оваа цел. Исто така, УНФПА ги повикува и сите 179 влади кои ја потпишаа Програмата за акција на Меѓународната конференција за население и развој одржана во Каиро во 1994 година да ги исполнат своите обврски за обезбедување универзален пристап кон сексуално и репродуктивно здравје, вклучително и доброволно планирање на семејството. Тоа не само што претставува прашање на заштита на здравјето и правата туку е и прашање на инвестирање во економскиот развој и во просперитетот и напредокот на човештвото, се вели во пораката на д-р Канем.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.