Daily news
Семејните компании се темел на глобалната економија
Семејните компании се темел на глобалната економија. Тие инвестираат на подолг рок и ја поддржуваат нивната заедница и вработени. Нивните амбиции, флексибилност, поттик и знаење ги става во витална и цврста позиција да просперираат и растат.
Но, овие бизниси се соочуваат со дополнителни предизвици кои произлегуваат не само од работењето туку и од комплицираните семејни односи.
Овие предизвици ги обработува Конференцијата за семејни бизниси, во организација на Клиар вју бизнис тренинг центар, која ќе се одржи на 31 мај во Бизнис салата на Скопски саем.
Оваа година на конференцијата ќе се зборува на нови три теми:
1. Најголемата болка на наследниците – Како да го преземат лидерството во компанијата и да воспостават авторитет?
2. Корпоративно управување во семејни компании
3. Што треба, а што не треба да се преземе од светските практики на трансфер на сопствеништвото?
Темите разработени на конференцијата ќе одговорат на следните прашања:
• Како вработените да Ве прифатат како нов лидер на компанијата?
• Како да ја уверите претходната генерација дека Вашиот лидерски стил, кој е различен од нивниот, ќе ја води компанијата во успешна насока?
• Како да го добиете признанието од претходната генерација дека сте способни да го водите бизнисот?
• Како да го поведете бизнисот во нова или различна насока, а притоа да ги почитувате достигнувањата на претходната генерација?
• Дали светските практики на транзиција кај семејни компании кои постојат 200 години се применливи во македонските компании кои постојат само 20 години?
• Од каде да почнете да работите на уредувањето на односите во Вашата семејна компанија?
• Кога всушност е соодветно време за малите и средни семејни компании да почнат да размислуваат за управување?
• Како корпоративното управување ќе ви помогне да ги надминете слабостите кои се карактеристични за семејните бизниси, како што се: неформалните односи, недостигот на дисциплина и комплексната управувачка структура?
• Како да ја максимизирате користа од семејното сопствеништво?
• Како успешно да ги надминете предизвиците кои ги носи растот на компанијата и истовремено таа да остане одржлива?
Говорници на конференцијата се:
• г. Борис Вукиќ, сениор Adizes консултант, експерт за семејни бизниси и
• г. Алексеј Волнец, офицер за корпоративно управување во департманот за управување за животна средина и за социјални прашања во Меѓународната Финансиска Корпорација (ИФЦ), дел од Групацијата на Светската банка во Вашингтон, САД. Негова специјалност се дизајнирање и испорака на тренинг програми за градење на капацитетите на раководните лица за управување со мали и средни претпријатија.
Освен предавачите, на конференцијата ќе имате можност да го чуете и искуствата на неколку панелисти, успешни македонски бизнисмени кои доаѓаат од семејни компании:
– Сашко Самрџиоски од Прилепска Пиварница
– Виктор Петков од Випро
– Анатол Кутревски од Пекабеско
– Ирена Јакимовска од Комфи Ангел
– Фросина Мешкова од Свисслион
– Иван Новаковски од Меѓународното училиште НОВА
– Горан Ѓорѓиоски од Специјал
– Александар Саздов од Издавачки Центар ТРИ
Не ја пропуштајте единствената Конференција за семејни бизниси во Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.