Daily news
Скокнаа облозите за „Трекзит” – букмејкерите ја зголемија шансата Трамп да не помине цел мандат
Растат влоговите во Европа и во САД за тоа дали американскиот претседател Доналд Трамп ќе се задржи на функцијата четири години, пишува агенцијата „Ројтерс”. Зголемениот интерес се забележува откако Трамп го разреши директорот на Федералното биро за истраги, Џејмс Коми, пишува агенцијата.
Меѓународниот проект за политички и финансиски облози и предвидувања со образовна цел „Предикт“ во последните два дена доби рекорден број договори за обложување во врска со прашањето дали Трамп ќе биде отстранет.
Сајтот ги определува „договорите” како прашања поврзани со предвидувања за иднината во политика или финансии.
Во меѓувреме букмејкери во САД се обложуваат на прашањето дали шефот на државата ќе остане на функцијата додека неговиот мандат истече во јануари 2021 година.
Во договорот е нагласено прашањето “Ќе биде ли Доналд Трамп отстранет во 2017 година?” На ова прашање за 24 часа се добиени над 100.000 обложувања, кои се појавија откако Трамп побарал од Коми да ја прекине истрагата за врските меѓу поранешниот советник за безбедност Мајкл Флин и Русија.
Рано во средата цената за „да” достигна рекордни 33 центи – или 33 проценти на 100-процентна веројатност Трамп дека ќе биде отстранет.
Вредноста во текот на денот се намали на 27%, откако во вторникот предвидувањата се намалија за три процентни.
Само пред една недела таа беше едвај седум проценти.
„Предикт“ заеднички го водат „Аристотел” (Aristotle), компанија базирана во Вашингтон, која е основана за политички консултантски услуги, и Универзитетот „Викторија” во Велингтон, Нов Зеланд. Сите корисници на порталот се регистрирани гласачи во САД.
“Педи Пауер бетфаер” (Paddy Power Betfair), која е друга компанија за облози, вели дека приходите кон неа од страна на корисниците, односно обложувањата за предвремено напуштање на Трамп, се во износ еквивалентен на 6470 долари.
Сумата е акумулирана само од првите неколку часа откако се појави информацијата дека Трамп побарал од Џејмс Коми да стави крај на истрагата на ФБИ за односите со Русија.
Прашањето дали Трамп предвремено ќе биде ослободен од претседателската функција , на име на облози собра над 270.000 долари. На истава тема, облози на прашање, дали тоа ќе се случи во 2017, 2018, 2019 или 2020 година или подоцна, е собрано над 480 000 долари.
“Ладброукс” (Ladbrokes), друга компанија во индустријата, веќе смета дека шансите за отстранување на Трамп е поголема и таа го промени предвидувањето од 4 до 5, на од 10 до 11. Тоа значи дека веројатноста Трамп да биде подложен на интерпелација е околу 56 проценти.
“Се занимаваме со политички облози и прашуваме колку по скандалот Трамп ќе може да се справи Трамп”, вели портпаролот на “Ладброукс” Џесика Бриџ.
“И покрај малата добивка на парио поддршката за импичмент на претседателот не ни остават друг избор освен тоа да го промениме предвидувањето.”Крај/мф/кс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.