Daily news
(ВИДЕО) Угостителите лути на државата поради селективни казни, работното време и високи даноци
Од здружението „Хорекаши“ велат дека тие не се против закони и правила, туку се за економски просперитет кој ќе ги искористи потенцијалите на Македонија кои лежат во туризмот. Затоа бараат партнерство со институциите за изготвување национална стратегија за економски развој во сферата на туризмот, угостителството и другите услужни дејности. Тие се согласуваат дека не е во ред келнер да зема плата од 200 евра, но велат дека толку можат да овозможат согласно нивните финансиски добивки. Од здружението додаваат дека со економската анализа до Нова година ќе видат дали тоа ќе се подобри.
„Според агенцијата за статистика, според работното време, редовно вработени во овој сектор се 150.000 лица, од вкупно 700.000. Ниту една власт не сфати дека нашата дејност е ткиво од каде што почнуваат други бизниси. Ние сме ткивото кое поврзува илјадници граѓани. Нашиот углед е нарушен, а ова здружение е формирано за подобрување на дејноста. Ние бараме изготвување на национална стратегија каде што ќе учествуваат локалната самоуправа, експерти од даночната политика и други министерства“, велат од здружението „Хорекаши“.
Тие велат дека се против даноци и давачки и бараат креирање политики што ќе овозможат подобар живот и социјална сигурност за вработените во угостителската дејност.
Оттаму додаваат дека не сакаат да биде регулирано работното време. Бараат реални трошоци за лиценцирање на објектите во рамки на европските практики кои се засновани на слободниот пазар.
Тие велат дека се мали компании без никаква политичка моќ. Затоа и се обединуваат и со институциите бараат заедничко решение за да креираат слободен пазар со фер и чесни правила на игра, а со тоа и нови работни места кои неминовно ќе произлезат од системско и темелно спроведување политики за економска и туристичка промоција на земјата.
„Даночната политика не го стимулира развојот на бизнисот, туку прави уназадување. Бараме од министерствата за економија и финансии средби за решавање на овој проблем“, вели Илија Аргировски.
Според Аргировски, нема доволно кадар во овој сектор бидејќи Македонија не произведува доволно квалитетен кадар за да работат во дејноста, а тоа треба да биде согледано од Министерството за образование.
„Работното време е исто така проблем. Од најурбано Скопје, ние имаме мртво Скопје, а проблем е работното време, кое треба да се реши. Перспективите на економскиот квалитет на земјата зависи од оваа точка. Со задоволство можеме да кажеме дека досега наидовме на одличен прием од Владата. Реалното работно време е да ни дозволат да работиме до 1 часот по полноќ, секој ден“, додава претставник на здружението.
Во врска со законот за пушење, тие велат дека истиот чекаат да биде изгласан бидејќи со него ќе се подигне прометот, а истовремено ќе се полни и државниот буџет со даноци. Од здружението „Хорекаши“ велат дека не се задоволни од предлог-законот и ќе бараат измени и дополнување на истиот.
К. Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.