Daily news
Фемицидот во пораст: Убиени 32 жени поради тоа што се жени
Македонското законодавство фемицидот или убиството на жена поради тоа што е жена неодложно го дефинира како кривично дело, е заклучокот од денешната прва конференција за фемицид во Македонија. Елена Димушевска, извршен директор на Националната мрежа против насилство врз жените и семејно насилство на конференцијата рече дека Македонија нема статистички податоци за бројот на фемициди оти не се прави разлика меѓу фемицид и убиство. Националната мрежа подготвува анализа на фемицидите во Македонија, која понатаму треба да биде основа за зајакнување на капацитетите во земјата за да се разбере прашањето за фемицидите.
„Во периодот од 2001 до август 2016 година регистрирани се 32 фемицида. 15 од овие убиства се случиле во периодот од 2013 до 2016 година. Во споредба со бројот на убиства јасно е дека расте бројот на фемициди. Податоците се дадени според неофицијални статистички податоци за фемициди, кои ги водат невладини организации врз основа на објави во медиумите. Во моментот Националната мрежа прави анализа на фемицидите. Досега успеавме да анализираме 10 од регистрираните 32 случаја. Кога ќе ја завршиме, анализата ќе биде јавен документ“, рече извршната директорка Димушевска.
При обработката на податоците што ги добиваат од полицијата, од судот и од медиумите, Димушевска вели дека ги земаат предвид возраста на жртвата и на сторителот, односот што го имаат, статус вработен/невработен, постоење пријава во локална полициска станица и центар за социјална работа, метод на убиство, мотив, место за случување, психичка состојба на сторителот, висина на пресуда, времетраење на судска постапка, како и одбрана на сторителот и признавање на делото.
Луиза Винтон, постојан координатор на ОН и претставник на УНДП и УНФПА во Македонија, на отворањето на конференцијата рече дека од особено значење за Македонија е да ја ратификува Истанбулската конвенција, која обврзува на координирана акција на сите фактори за борба против насилството врз жената оти на секој фемицид му претходи цела низа луѓе што знаеле нешто за да го спречат насилството, но не презеле ништо.
Светлана Цветковска од Министерството за труд и социјална политика на конференцијата информира дека веќе се формирани работни групи за ратификација на Истанбулската конвенција, а се работи и на акциски план за нејзина имплементација.
За четиригодишното искуството во напорите за препознавање на фемицидот во светот на конференцијата зборуваше Шалва Веил, професорка на Хебрејскиот универзитет во Ерусалим и позната истражувачка и гласноговорничка на темите насилство врз жени и убиство на жени – фемициди. Таа рече дека кога почнале да зборуваат за фемицид во 2013 година, ретко кој го препознавал терминот, но по четири години, среќна е што луѓето во многу земји, меѓу кои и во Македонија, знаат за што се работи.
М.И.П.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.